പൂർവാംബരത്തിലെ

സൗവർണ്ണ രഥമേറി

സിന്ദൂര വർണ്ണത്തിൻ

മുഴുക്കാപ്പു ചാർത്തി

കാലാതിവർത്തിയാം

ആദിത്യ ദേവൻറ്റെ

തിരുവെഴുന്നള്ളത്തിൻ

ശംഖൊലി ഉണരുന്നൂ...
 

ഇന്നലെയുടെ ഖിന്നമാം

തമോമയ ചിന്തസർവതും

വിസ്മരിച്ചിന്നിതാ

ഫുല്ല തല്ലജ കാന്തിയായ്

പ്രസന്നയായ്

നിത്യ സുന്ദരി 

പ്രകൃതീ മനോഹരി
 

പുഞ്ചിരിച്ചുംകൊ-

ണ്ടോരോരോ തരുവിലും

സപ്ത വർണ്ണത്തിൻ

മേലങ്കി ചാർത്തുന്നു

വർണ്ണ വൈവിധ്യ

മേളനം കണ്ടു-

മ്മറത്തെത്തി

മുത്തശ്ശി മൊഴിയുന്നു...
 

"നോക്കു മക്കളേ

ചിങ്ങപ്പുലരി തൻ

നിത്യ വിസ്മയത്തി-

ന്നാഗമ സാന്ത്വനം!

ഓർത്തിടാം പാര-

മേറെക്കനിവാർന്ന

ചിൽപ്രകാശിയാ

മൂർത്തി തൻ കീർത്തനം
 

വാഴ്ത്തിടാമാത്മ

നിർവൃതി പകർന്നിടും

ഉറ്റ ബന്ധൂ

പരിജനമിത്രങ്ങൾ

ഒറ്റയമ്മ തൻ

മക്കളാണോർക്ക നാം

ഭൂവിലാദ്യമായ്

മാനവർ സർവരെ
 

ചേർത്തു നിർത്തിയ

നിസ്തുല ദർശിയാം

ഓണമാം മഹോത്സവ

സന്ദേശം സോദരർ

നമുക്കേവർക്കു-

മൊരുപോലെ...

വിഘടനം പാടേ

തള്ളിക്കളഞ്ഞിടാം,

ചേർന്നു നിന്നിടാം

സഹോദരരാണു നാം.
 

Content Summary: Malayalam Poem ' Chingappulari ' Written by Kishore Kandangath