നിഴലോർമകൾ – അവിനാഷ് മണ്ണാർക്കാട് എഴുതിയ കവിത

പെയ്തൊഴിയാ മേഘങ്ങളെ പോൽ

വഴിയറിയാ പൈതങ്ങളെ പോൽ

നിറഞ്ഞ മിഴികളിൽ കണ്ടു ഞാൻ

കഴിഞ്ഞ കാലത്തിൻ ഓർമ്മകൾ
 

കൊഴിഞ്ഞു പോയ വസന്തങ്ങൾ

മുറിഞ്ഞ ഹൃത്തിൻ നൊമ്പരങ്ങൾ

ഏതോ പഴയൊരു പുസ്തകത്താളിൽ

എന്നോ എഴുതിയ വരികൾക്കിടയിൽ

കാണാതെ പോയൊരെന്നെ തിരഞ്ഞു ഞാൻ
 

കാലം കഴിക്കുവതിന്നും വൃഥാ തേടിയലയുവതിന്നും

മിഴിനീരു പൊഴിയുന്ന കദനങ്ങളേ

മഴനൂലു ചാലിച്ച വിരഹങ്ങളേ

കണ്ണോടു കൺനോക്കി കഥ പറയും

കാണാക്കിനാവുള്ള പ്രണയങ്ങളേ
 

തീരാനോവിന്റെ ഇടനാഴിയിൽ

കൂട്ടായെത്തുന്ന സ്വപ്നങ്ങളേ

ഇറയത്തു പൊഴിയുന്ന മഴത്തുള്ളി പോൽ

നറുമുത്തു കൊഴിയുന്ന ചിരി കണ്ടു ഞാൻ
 

നിറമാല ചാർത്തുന്ന നിന്നോർമ്മകൾ

നിത്യ വസന്തമായി പൂത്തുനിൽപ്പൂ

മനസ്സിന്റെ ജാലക വാതിൽ തുറന്നു ഞാൻ

വെറുതെ ആരെയോ കാത്തിരിപ്പൂ
 

Content Summary: Malayalam Poem ' Nizhalormakal ' Written by Avinash Mannarkkad