നിശാനിയമം – സുനിൽരാജ്സത്യ എഴുതിയ കവിത

കലണ്ടർ താളിലെ തിയതികളിലേക്ക്-

കണ്ണെത്തിക്കുവാനാകാതെ, 

മതിലിൽ തൂങ്ങിയ ഘടികാരസൂചിയിലെ,

സമയാക്കങ്ങളിലേക്ക് മാത്രം നോക്കി-

ശാസ്ത്രം കുടിച്ച് ചുവന്ന കണ്ണുകൾ!
 

തണ്ടൊടിഞ്ഞ ചീര പോലെ 

അഹന്തകൾ വാടിക്കിടക്കുന്നു.

ആശവറ്റിയ മനസ്സുപോലെ 

വീഥികൾ വരണ്ടിരിക്കുന്നു. 

ഗ്രീഷ്മത്തിന്റെ തീ നാവുകൾ നക്കിയ 

ഭൂമിയുടെ മാറിടവും വറ്റി കരിഞ്ഞു!
 

തൊണ്ട വരണ്ട കിളികളുടെ പാട്ടുകളെ- 

മനുഷ്യനൊമ്പരങ്ങളുടെ നിശ്വാസങ്ങൾ, അണച്ചു. 

വിഷപ്പാമ്പുകൾ മാത്രം ഇഴയുന്നുണ്ടായിരുന്നു, 

വിധി കാത്തിരിക്കുന്ന നാളെയുടെ 

പ്രാർഥനകളിലേക്ക്!!