അകറ്റുമെന്നറിഞ്ഞിട്ടുമൊരു ഇത്തിൾക്കണ്ണിയാവുന്നതെന്തേ – ശ്രീപദം എഴുതിയ കവിത

അകറ്റുമെന്നറിഞ്ഞിട്ടുമൊരു 

ഇത്തിൾക്കണ്ണിയാവുന്നതെന്തേ..

ഒരുനാൾ വലിച്ചെറിയാമൊരു

പാഴ്ച്ചെടിയാണോ...
 

നിന്നിലാഴ്‌ന്നിറങ്ങിയ വേരിനെ

പറിച്ചെടുക്കാനാവാതെ

നിന്റെ ശാഖകളിലേക്ക് 

പടർന്നു കയറുമൊരു മോഹവള്ളി

പരാദമാണെന്ന് മറന്നു 

നിന്നിലെന്നാധിപത്യവും ചുമത്തുന്നൂ..
 

നിന്റെ ചൂടും, നിന്നിലെ 

തണുപ്പുമേൽക്കാതെങ്ങനെ

യെന്നിൽ വസന്തം വിരിയും...

നിന്റെ ചോരയും മജ്ജയും 

ചിന്തകളും ഊറ്റിയെടുത്ത് 

നിന്നോടൊപ്പമൊരുമിച്ചടർന്ന

ലിയണമീധരണിയിലെനിക്ക്...