സ്വപ്നങ്ങൾ – രാജശ്രീ സി. വി. എഴുതിയ കവിത

സ്വപ്നം കാണാൻ

തുടങ്ങിയ നാളുകളിൽ 

പറവകളെപ്പോലെ

പാറി നടക്കാൻ മോഹിച്ചു..

ആശയുടെ മുകുളങ്ങൾ

ചിറകുകളായി..

മഴവില്ലിന്റെ ചാരുതയിൽ 

ലയിച്ചങ്ങനെ പറന്നുയരാൻ 

ചിറകുവിടർത്തി 

പറക്കാനാഞ്ഞപ്പോഴാണ്

ചിറകുകളെ ചേർത്ത് കെട്ടിയ

കടും കെട്ടു കണ്ടത്.
 

കെട്ടിനെ അറുത്തെറിഞ്ഞ്

ചിറകുവിരിച്ചു പറക്കാൻ

ശ്രമിച്ചുകൊണ്ടിരിയ്ക്കുമ്പോൾ

പുതിയ കടും കെട്ടുകൾ തൂവലിന്നിടയിൽ

മുറുകി വരുന്നതറിഞ്ഞ്

തൂവലുകളറുത്തെറിഞ്ഞ്

സ്വപ്നങ്ങളെ സ്വന്തമാക്കാൻ

അശ്വത്തിന്റെ കരുത്തോടെ

കുതിച്ചു പായാൻ പഠിച്ചു ഞാനിന്ന്..