ഊർമ്മിള – കൃഷ്ണതാര എസ്. അശോക് എഴുതിയ കവിത

മിഥിലാപുരിയിലെ മൈഥിലിയായ്

മട്ടുപ്പാവിൽ വാഴേണ്ടവൾ

ജനകന്റെ പുത്രിയാം ജാനകിയായ്

ജനഹൃദയങ്ങളിൽ വാഴേണ്ടവൾ!!

രാമായണത്തിന്നേതോ ഇതളിലായ്

വിരഹത്തിൻ നിദ്രയിലാഴ്ന്നൊരുവൾ
 

ജ്യേഷ്ഠത്തിയാം സീതതൻ സന്തുഷ്ടിക്കായ്

തന്നുടെയാനന്ദം ഹോമിച്ചവൾ

രാമാനുജനാം ലക്ഷ്മണൻ തൻ 

ധർമ്മ പത്നി അവൾ...

ജീവിതാനന്ദം അറിയാത്തവൾ!!
 

സീത തൻ ത്യാഗത്തെ വാഴ്ത്തിയോരാക്കവി

നിർദ്ദയം വിസ്മരിച്ചോ ആ ത്യാഗരത്നത്തെ???

ഭർത്തൃമതിയാകിലും വൈധവ്യം നെറുകയിൽ

പേറേണ്ടി വന്നൊരു ദുഃഖ ശിൽപം!

വിരഹത്തിൻ താപത്താൽ വെന്തെരിഞ്ഞെങ്കിലും

വൈദേഹിയെന്ന പേരവൾക്കന്യം!!
 

പതി തൻ നിദ്രയേറ്റുവാങ്ങി അവൾ 

പതിന്നാലു സംവത്സരം മയങ്ങി

ത്യാഗത്തിൻ നിർമല സ്ത്രീ രത്നമേ നിന്നെ

ശ്രീരാമ ദേവനും വണങ്ങിയില്ലേ

ഊഷ്മള ത്യാഗത്തിൻ ഉൽകൃഷ്ട ജന്മമേ

സാദരം നിന്നെ വണങ്ങിടുന്നു!!
 

(പടനിലം  എച്ച്. എസ്. എസ്. സ്കൂളിലെ ആറാം ക്ലാസ് വിദ്യാർഥിനിയാണ് കൃഷ്ണതാര എസ്. അശോക്)