കിനാവ് – ഗിരിജ ചാത്തുണ്ണി എഴുതിയ കവിത

കിനാവിന്റെ അറ്റത്ത് ഉയലാടിയ നിശാഗന്ധിയാണ്  

നിന്നെകുറിച്ചെന്നോട് മൊഴിഞ്ഞത്

ഓർമ്മതെറ്റുകളിൽ അടർന്നുവീണപ്പോഴായിരുന്നു

സ്വപ്നമെന്ന മരുഭൂമിയിലെ മലമുഴക്കിവേഴാമ്പൽ 

ഇരുളിൽ നഷ്ടപ്പെട്ട ഉറക്കത്തിന്റെ 

അർഥം തേടിയലഞ്ഞത്!
 

കടലാസുപൂക്കളുടെ ചുവപ്പിനെ 

അസ്തമയത്തിന്ന് കടം കൊടുത്തപ്പോഴാണ്

അണഞ്ഞുപോയ തീപ്പൊരികളിൽ 

നിന്നെ ആലേഖനം ചെയ്തത്!
 

ജീവിതത്തിനും മരണത്തിനുമിടക്കുള്ള  

സമയദൂരങ്ങളെ നിദ്രയെന്നടയാളപ്പെടുത്തിയ 

രാവുകളാണ് നിന്നെ എന്നിലേക്ക് 

വിവർത്തനം ചെയ്തത്!
 

കനവുകൾ കനിവുകളാകുമ്പോൾ

നീയെന്ന സ്വപ്നത്തെ ഞാൻ 

ജീവിതമെന്ന വിശുദ്ധഗ്രന്ഥത്തിൽ 

അടയാളപ്പെടുത്തട്ടെ!!