ആരെയും വെല്ലും മേക്ക്ഓവറിൽ റാണു മണ്ഡൽ; ചിത്രങ്ങളും വിഡിയോയും വൈറൽ
Mail This Article
ലതാ മങ്കേഷ്കറിന്റെ ‘ഏക് പ്യാർ കാ നഗ്മാ ഹായ്’ എന്ന ഗാനം ആലപിച്ച് സമൂഹമാധ്യമങ്ങളിൽ പ്രശസ്തയായ റാണു മണ്ഡൽ വീണ്ടും വാർത്തകളിൽ നിറയുന്നു. വൈറൽ ഗായികയുടെ വേഷപ്പകർച്ചയുടെ ചിത്രങ്ങൾ ഇപ്പോൾ സമൂഹമാധ്യമങ്ങളിൽ വൈറലാവുകയാണ്. മേക്കപ്പ് ചെയ്ത് മുഖം ആകെ മാറ്റിയ റാണുവിന്റെ ചിത്രങ്ങൾ പുറത്തു വന്നതിന് പിന്നാലെ വിമർശനങ്ങളുടെയും ട്രോളുകളുടെയും പെരുമഴയാണ്. മുഖത്താകെ മേക്കപ്പ് ചെയ്ത് ലഹങ്ക ധരിച്ച് വലിയ ആഭരണങ്ങൾ അണിഞ്ഞിരിക്കുന്ന റാണുവിന്റെ ചിത്രങ്ങളാണ് ഇപ്പോൾ പ്രചരിക്കുന്നത്.
തനിക്കൊപ്പം സെൽഫിയെടുക്കാൻ ശ്രമിച്ച ആരാധികയെ റാണു ശകാരിക്കുന്നതിന്റെ വിഡിയോ സമൂഹമാധ്യമങ്ങളിൽ വൈറലായിരുന്നു. ‘എന്നെ തൊടരുത് ഞാൻ സെലിബ്രിറ്റിയാണ്’ എന്നു പറഞ്ഞു കൊണ്ട് ആരാധികയെ അധിക്ഷേപിച്ച റാണുവിനെതിരെ വിമർശനങ്ങൾ ഉയർന്നത് ഈ അടുത്ത കാലത്താണ്. അതിനു പിന്നാലെയാണ് ഇപ്പോൾ മേക്കോവറിന്റെ ചിത്രങ്ങൾ പുറത്തു വന്നത്.
ഉപജീവനത്തിനായി റെയിൽവേ സ്റ്റേഷനിൽ ഇരുന്ന് പാട്ടു പാടിയ റാണു മണ്ഡലിന്റെ വിഡിയോ സമൂഹമാധ്യമങ്ങളിൽ പ്രചരിച്ചതിന് പിന്നാലെ സംഗീതസംവിധായകൻ ഹിമേഷ് രേഷ്മിയ ‘ഹാപ്പി ഹർദി ആൻഡ് ഹീർ’ എന്ന ചിത്രത്തിൽ പാടാൻ അവർക്ക് അവസരം കൊടുത്തിരുന്നു. ഷാഹിദ് കപൂറും കരീന കപൂറും ഒന്നിച്ചഭിനയിച്ച 36 ചൈന ടൗൺ എന്ന ചിത്രത്തിലെ ‘ആഷികി മെൻ തേരി’ എന്ന ഗാനത്തിന്റെ പുതിയ പതിപ്പും അവർ റെക്കോർഡ് ചെയ്തിരുന്നു.