സെപ്റ്റംബര്‍ 11 ഇരുപതു വര്‍ഷങ്ങള്‍ക്കു ശേഷം

HIGHLIGHTS
  • രണ്ടു യുദ്ധങ്ങള്‍ക്കു കാരണമായ ഭീകരാക്രമണം
  • ഉത്തരമില്ലാത്ത ചോദ്യങ്ങള്‍ ഇനിയും ബാക്കി
videsharangom-ttack-world-trade-centre-twin-tower
A hijacked commercial plane crashing into the World Trade Center in New York. (File) Photo Credit : Seth Mcallister / AFP
SHARE

ഇരുപതു വര്‍ഷംമുന്‍പ് സാധാരണപോലുള്ള ഒരു ദിവസമായിരുന്നു അത്. ചൊവ്വാഴ്ച രാവിലെ. അമേരിക്കയിലെങ്ങും തെളിഞ്ഞ കാലാവസ്ഥ. പ്രസിഡന്‍റ് ജോര്‍ജ് ഡബ്ളിയു. ബുഷ് ഫ്ളോറിഡയിലെ ഒരു സ്കൂള്‍ പരിപാടിയില്‍ പങ്കെടുക്കുകയായിരുന്നു. അമേരിക്കക്കാര്‍ മാത്രമല്ല, ലോകത്ത് ആരും സ്വപ്നത്തില്‍പ്പോലും കണ്ടിട്ടില്ലാത്ത  അത്രയും ഭീകരമായ സംഭവങ്ങള്‍ അരങ്ങേറിയത് അന്നാണ്. 2001 സെപ്റ്റംബര്‍ 11 അങ്ങനെ അമേരിക്കയുടെ ചരിത്രത്തിലെ ഒരു വഴിത്തിരിവായി.

videsharangom-us-president-george-w-bust
Chief of Staff Andrew Card (L) whispering into US President George W. Bush's ear during a school reading event in Sarasota, Florida shortly after the Twin Towers of the World Trade Center in New York were struck by hijacked airplanes. (File) Photo Credit : Paul J Richards / AFP Photo

അതിന്‍റെ അനന്തരഫലങ്ങളായിരുന്നു അഫ്ഗാനിസ്ഥാനിലും ഇറാഖിലും അമേരിക്ക നടത്തിയ യുദ്ധങ്ങള്‍. അമേരിക്കയുടെ ചരിത്രത്തിലെ ഏറ്റവും നീണ്ടയുദ്ധമെന്ന വിശേഷണം നേടിയ അഫ്ഗാന്‍ യുദ്ധം അവസാനിപ്പിച്ചുകൊണ്ട് യുഎസ് സൈന്യം മടങ്ങിയതേയുള്ളൂ. പത്തുദിവസം കഴിയുമ്പോഴേക്കും ഈ വര്‍ഷത്തെ സെപ്റ്റംബര്‍ 11 വന്നെത്തുകയും ചെയ്തു. 

എന്താണ് അന്നു യഥാര്‍ഥത്തില്‍ സംഭവിച്ചത്, ആരാണ് അതിന് ഉത്തരവാദികള്‍ എന്നീ ചോദ്യങ്ങള്‍ക്കെല്ലാം ഇതിനകം ഉത്തരം ലഭിച്ചിട്ടുണ്ട്. എങ്കിലും ആ സംഭവങ്ങള്‍ തടയുവാന്‍ അമേരിക്കയ്ക്കു കഴിയുമായിരുന്നില്ലേ എന്ന ചോദ്യം വ്യക്തമായ ഉത്തരം കിട്ടാതെ ഇപ്പോഴും അവശേഷിക്കുന്നു.

videsharangom-world-trade-centre-attack
A jet airliner is lined up on one of the World Trade Center towers in New York. (File) Photo Credit : Carmen Taylor / AP Photo

ലോകമൊട്ടുക്കുമുള്ള ജനങ്ങള്‍ ടിവിയില്‍ കണ്ടത് അമേരിക്കയുടെ വാണിജ്യ തലസ്ഥാനമായ ന്യൂയോര്‍ക്കിലെ പ്രശ്സ്തമായ വേള്‍ഡ് ട്രേഡ് സെന്‍ററിന്‍റെ ഇരട്ട ഗോപുരങ്ങളില്‍ ഒന്നില്‍ ഒരു ബോയിങ് 767 യാത്രാവിമാനം ചെന്നിടിക്കുന്നതായിരുന്നു. വാസ്തവത്തില്‍ അതിനു 17 മിനിറ്റ് മുന്‍പ്തന്നെ അതേ വിധത്തിലുള്ള വേറൊരു വിമാനം മറ്റേ ഗോപുരത്തിലും ചെന്നിടിച്ചിരുന്നു. രണ്ടു തവണയുണ്ടായ ഇടിയുടെ ആഘാതത്തിലും തുടര്‍ന്നുണ്ടായ അഗ്നിജ്വാലയിലും സ്ഫോടനത്തിലും കെട്ടിടമാകെ തകര്‍ന്നു നിലംപൊത്തി. 

ആദ്യസംഭവം ഒരു അപകടമാവാം എന്നു കരുതിയവര്‍ക്കു രണ്ടാം സംഭവത്തോടെ കാര്യം മനസ്സിലായി. അമേരിക്ക ഈസ് അണ്ടര്‍ അറ്റാക്ക് (അമേരിക്ക ആക്രമിക്കപ്പെടുന്നു). പ്രസിഡന്‍റിനെ ഉടന്‍തന്നെ ഫ്ളോറിഡയില്‍നിന്നു മാറ്റുകയും വൈറ്റ് ഹൗസിൽ  എത്തിക്കുകയും ചെയ്തു. അമേരിക്ക ആക്രമിക്കപ്പെടുന്നുവെന്ന നിഗമനത്തിന് അടിവരയിടുന്ന രണ്ടു സംഭവങ്ങള്‍കൂടി തുടര്‍ന്നുണ്ടായതും ചരിത്രമായി. 

videsharangom-us-world-trade-centre-twon-towers
Twin Towers of the World Trade Center in New York billowing smoke after hijacked airliners crashed into them. (File) Photo Credit : Henny Ray Abrams / AFP Photo

മൂന്നാമതൊരു വിമാനം യുഎസ് പ്രതിരോധവകുപ്പിന്‍റെ ആസ്ഥാനവും അമേരിക്കന്‍ സൈനികശക്തിയുടെ സിരാകേന്ദ്രവുമായ പെന്‍റഗണില്‍ ചെന്നിടിച്ചു.  നാലാമതൊരു വിമാനം പ്രസിഡന്‍റിന്‍റ് ആസ്ഥാനമായ വൈറ്റ്ഹൗസില്‍നിന്ന് ഏറെയൊന്നും അകലെയല്ലാതെ പെന്‍സില്‍വാനിയയിലെ ഒരു വയലില്‍ തകര്‍ന്നുവീണു.  

എല്ലാ സംഭവങ്ങളിലുംകൂടി മരണം മൂവായിരത്തോളമായിരുന്നു. ന്യൂയോര്‍ക്കില്‍ മാത്രം മരിച്ചവര്‍ 2763. അമേരിക്കക്കാര്‍ക്കു പുറമെ, മറ്റു നൂറോളം  രാജ്യങ്ങളില്‍നിന്നുള്ളവരും ഇവരില്‍ ഉള്‍പ്പെടുന്നു. പെന്‍റഗണില്‍ മരണം 189. പെന്‍സില്‍വാനിയയില്‍ 49. മൂന്നിടത്തുമായി പരുക്കേറ്റവര്‍ ആയിരങ്ങള്‍. പരുക്കു കാരണവും തുടര്‍ന്നുണ്ടായ പല വിധരോഗങ്ങള്‍ക്കിരയായും മരിച്ചവര്‍ വേറെയും. 

നാലു വിമാനങ്ങളിലും കയറിക്കൂടിയ ഭീകരര്‍ (മൊത്തം 19 പേര്‍) യാത്രയ്ക്കിടയില്‍ വിമാനങ്ങള്‍ റാഞ്ചുകയും അവയെ അമേരിക്കയെ ആക്രമിക്കാനുള്ള മിസൈലുകളായി ഉപയോഗിക്കുകയുമായിരുന്നു. അവരും മരിച്ചു. 

ന്യൂജഴ്സിയില്‍നിന്നു സാന്‍ഫ്രാന്‍സിസ്കോയിലേക്കു പുറപ്പെട്ട, നാലാമത്തെ വിമാനത്തില്‍ റാഞ്ചികള്‍ക്കു യാത്രക്കാരില്‍നിന്ന് എതിര്‍പ്പ് നേരിടുകയുണ്ടായി. അവര്‍ തമ്മിലുള്ള സംഘട്ടനത്തിനിടയിലാണ് വിമാനം പെന്‍സില്‍വാനിയയിലെ വയലില്‍ തകര്‍ന്നു വീണതും. റാഞ്ചികള്‍ ആ വിമാനം എങ്ങോട്ടുകൊണ്ടുപോകാന്‍ ശ്രമിക്കുകയായിരുന്നുവെന്ന് ഇപ്പോഴും വ്യക്തമല്ല. 

വൈറ്റ്ഹൗസ്, പാര്‍ലമെന്‍റ് മന്ദിരം സ്ഥിതിചയ്യെന്ന ക്യാപിറ്റോള്‍ കെട്ടിടം, വാഷിങ്ടണില്‍നിന്ന് ഏറെയൊന്നും അകലെയല്ലാതെ മേരിലാന്‍ഡിലുള്ള പ്രസിഡന്‍റിന്‍റെ ഒഴിവുകാല വസതി (ക്യാമ്പ് ഡേവിഡ്), ആ ഭാഗങ്ങളിലെ ആണവ നിലയങ്ങള്‍ എന്നിവയില്‍ ഏതെങ്കിലും ഒന്നാകാം അവര്‍ ലക്ഷ്യമിട്ടിരുന്നതെന്നു ഊഹിക്കപ്പെടുന്നു. അവര്‍ വിജയിച്ചിരുന്നുവെങ്കില്‍ എന്തു സംഭവിക്കുമായിരുന്നുവെന്ന ചിന്തയും ഞെട്ടലുണ്ടാക്കുന്നു. 

വിദേശികളുടെ ആക്രമണത്തിന് അമേരിക്ക ഇരയാകുന്നത് ഇതാദ്യമായിരുന്നില്ല. രണ്ടാം ലോകമഹായുദ്ധകാലത്ത് 1941ല്‍ പേള്‍ ഹാര്‍ബറില്‍ ജപ്പാന്‍ നടത്തിയ വ്യോമാക്രമണം പലരും ഓര്‍ത്തുപോയിരിക്കണം.  എന്നാല്‍ പേള്‍ ഹാര്‍ബര്‍ സ്ഥിതിചെയ്യുന്നത് യുഎസ് വന്‍കരയ്ക്കു പുറത്തു ഹവായ് ദ്വീപിലാണെങ്കില്‍ ഈ ആക്രമണം യുഎസ് വന്‍കരയ്ക്ക് അകത്തുവച്ചുതന്നെയായിരുന്നു. 

അമേരിക്കക്കാരുടെ ആലസ്യപൂര്‍ണമായ സുരക്ഷിത ബോധത്തെ ഇതു പെട്ടെന്ന് തകിടംമറിച്ചു. അതിനേക്കാളേറെ ആഴത്തിലുള്ളതായിരുന്നു ലോകത്തെ ഏറ്റവും വലയ സാമ്പത്തിക-സൈനിക ശക്തിയെന്ന നിലയിലുള്ള അമേരിക്കയുടെ അഭിമാന ബോധത്തിനുണ്ടായ മുറിവ്‌. വേള്‍ഡ് ട്രേഡ് സെന്‍റര്‍ യുഎസ് സാമ്പത്തികശേഷിയുടെ പ്രതീകമായിരുന്നുവെങ്കില്‍ രാജ്യത്തിന്‍റെ സൈനിക ശക്തിയുടെ പ്രതാപം വിളിച്ചോതുകയായിരുന്നു പെന്‍റഗണ്‍. 

videsharangom-remains-world-trade-centre
The rubble of the World Trade Center smoulders following a terrorist attack 11 September 2001 in New York. Photo Credit : Alex Fuchs / AFP Photo

അമേരിക്കയ്ക്കെതിരെ യുദ്ധം പ്രഖ്യാപിച്ചിരുന്ന ഭീകര സംഘടനയായ അല്‍ഖായിദയുടെ പണിയാണ് ഇതെന്നായിരുന്നു തുടക്കം മുതല്‍ക്കേയുള്ള സംശയം. ആരോപണം ആദ്യം അവര്‍ നിഷേധിച്ചുവെങ്കിലും പിന്നീടു സമ്മതിച്ചു. ഇസ്രയേലിന് അമേരിക്ക നല്‍കിവരുന്ന പിന്തുണ, ഇറാഖിനെതിരെ യുഎസ് നേതൃത്വത്തില്‍ നടത്തിവരുന്ന ഉപരോധം, മധ്യപൂര്‍വദേശത്തെ യുഎസ് ഇടപെടല്‍ എന്നിവ അതിനുള്ള കാരണങ്ങളായി എടുത്തുപറയുകയും ചെയ്തു. 

അ്ല്‍ഖായിദയ്ക്കെതിരെ നീങ്ങാന്‍ പ്രസിഡന്‍റ് ബുഷ് അധികം കാത്തുനിന്നില്ല. അല്‍ഖായിദയ്ക്കും അവരുടെ നേതാവായ ഉസാമ ബിന്‍ ലാദനും സംരക്ഷണം നല്‍കിയിരുന്ന താലിബാന്‍ ഭരണകൂടത്തെ അഫ്ഗാനിസ്ഥാനില്‍ നിന്നു പുറത്താക്കാന്‍ അദ്ദേഹം പട്ടാളത്തെ അയച്ചു. അങ്ങനെ തുടങ്ങിയതായിരുന്നു 20 വര്‍ഷം നീണ്ടുനിന്നഅഫ്ഗാന്‍ യുദ്ധം.  അതിനിടയില്‍തന്നെയാണ് സദ്ദാം ഹുസൈനെ പുറത്താക്കാനായി ബുഷ് ഇറാഖിനെ ആക്രമിച്ചതും. 

രണ്ടു മാസത്തിനകം താലിബാനെ പുറത്താക്കാന്‍ കഴിഞ്ഞ  അമേരിക്കയക്ക് ബിന്‍ ലാദനെ കണ്ടെത്താന്‍ പത്തുവര്‍ഷം തിരയേണ്ടിവന്നു. പിടികൂടുകയോ പിടികൂടാന്‍ സഹായിക്കുകയോ ചെയ്യുന്നവര്‍ക്കു രണ്ടരക്കോടി ഡോളറിന്‍റെ ഇനാം പ്രഖ്യാപിച്ചിട്ടും ഫലമുണ്ടായില്ല. പാക്കിസ്ഥാനില്‍ ഒളിച്ചു താമസിക്കുകയായിരുന്ന അല്‍ഖായിദ തലവനെ ഒടുവില്‍ യുഎസ് കമാന്‍ഡോകള്‍ 2011 മേയില്‍ വെടിവച്ചുകൊന്നു. 

ഈജിപ്തുകാരനായ ഭീകര സംഘത്തലവന്‍ മുഹമ്മദ് അത്ത ഉള്‍പ്പെട 19 വിമാനറാഞ്ചികളും ജീവനോടെ ബാക്കിയായില്ലെങ്കിലും അവരെ സംബന്ധിച്ച എല്ലാവിവരങ്ങളും യുഎസ് കുറ്റാന്വേഷകര്‍ പിന്നീടു കണ്ടെത്തുകയുണ്ടായി. ഓരോ വിമാനത്തിലും അഞ്ചുപേര്‍ കയറണമെന്നാണത്രേ ഉദ്ദേശിച്ചിരുന്നത്.  പക്ഷേ, പെന്‍സില്‍വാനിയയില്‍ തകര്‍ന്ന വിമാനത്തില്‍ കയറിപ്പറ്റിയ സംഘത്തില്‍ നാലു പേര്‍ മാത്രമേ ഉണ്ടായിരുന്നുള്ളൂ.  

സക്കരിയ്യ മൂസാവി എന്ന അറബ് വംശജനായ ഫ്രഞ്ചുകാരനും അവരോടൊപ്പം  ചേരേണ്ടതായിരുന്നു. പക്ഷേ, അതിന് ഏതാനും ദിവസങ്ങള്‍ക്കു മുന്‍പ് തന്നെ അമേരിക്കയുടെ മറ്റൊരു ഭാഗത്തു വേറൊരു കേസില്‍ അയാള്‍ അറസ്റ്റിലായി. കൂടുതല്‍ ഭീകരമായ ഒരു കുറ്റകൃത്യത്തില്‍ ഭാഗഭാക്കാനാണ് അയാള്‍ എത്തിയിരുന്നതെന്ന കാര്യം യുഎസ് അധികൃതര്‍ക്ക് ഊഹിക്കാന്‍ പോലും കഴിഞ്ഞില്ല. ചില വിദേശികള്‍ അമേരിക്കയിലെ ഫ്ളയിങ് സ്കൂളുകളില്‍ ചേര്‍ന്നു വിമാനം പറത്തലില്‍ പരിശീലനം നേടുന്ന കാര്യം അധികൃതരുടെ ശ്രദ്ധയില്‍പ്പെട്ടിരുന്നുവെന്ന വിവരവും പിന്നീടു പുറത്തുവന്നു. അവരില്‍ ചിലര്‍ക്കു വിമാനം താഴെയിറക്കാന്‍ പഠിക്കുന്നതില്‍ താല്‍പര്യമുണ്ടായിരുന്നില്ലത്രേ.  തികച്ചും അസാധാരണമായ ഈ പെരുമാറ്റത്തിനു കാരണമെന്ത് എന്നന്വേഷിക്കാന്‍ പക്ഷേ, ബന്ധപ്പെട്ടവരാരും മിനക്കെട്ടില്ല. 

അല്‍ഖായിദയിലെ രണ്ടു പ്രമുഖ  പ്രവര്‍ത്തകര്‍ മലേഷ്യയിലെ ഒരു രഹസ്യ യോഗത്തില്‍ പങ്കെടുത്തശേഷം 2000 ജനുവരിയില്‍ അമേരിക്കയില്‍ എത്തിയതായി യുഎസ് ചാരവിഭാഗമായ സിഐഎക്കു വിവരം ലഭിച്ചിരുന്നു. പക്ഷേ, തുടര്‍നടപടികള്‍ ഒന്നുമുണ്ടായില്ല. വിമാന റാഞ്ചികളില്‍ ആ രണ്ടുപേരും ഉണ്ടായിരുന്നു.

videsharangom-george-w-bush-us-attack-review-meeting
U.S. President George Bush (R) is pictured with Vice President Dick Cheney (L) and senior staff in the President's Emergency Operations Center in Washington in the hours following the September 11, 2001 attacks in this U.S. (File) Photo Credit : U.S. National Archives via Reuters

ആക്രമണം ആസൂത്രണം ചെയ്തത് ഖാലിദ് മുഹമ്മദ് ഷെയ്ക്ക് എന്ന പാക്ക് വംശജനാണെന്നാണ് പിന്നീടു കണ്ടെത്തിയത്. വേള്‍ഡ് ട്രേഡ് സെന്‍റര്‍ 1993ല്‍ ബോംബ് വച്ചു തകര്‍ക്കാന്‍ ശ്രമിച്ച റംസി യൂസുഫിന്‍റെ അമ്മാവനാണിയാള്‍. ഇന്ത്യയില്‍ പ്രവര്‍ത്തിച്ചിരുന്ന യുഎസ് ജേണലിസ്റ്റ് ഡാനിയല്‍ പേളിനെ പാക്കിസ്ഥാനില്‍ വധിച്ച കേസിലും പ്രതിയായിരുന്നു. 

ഇവര്‍ ഉള്‍പ്പെടെ അറുനൂറോളം പേരാണ് പിടിയിലായത്. മിക്കവരെയും പാക്കിസ്ഥാന്‍ അധികൃതര്‍ അറസ്റ്റ്ചെയ്തു അമേരിക്കയെ ഏല്‍പ്പിക്കുകയായിരുന്നു. എല്ലാവരും ക്യൂബയില്‍ യുഎസ് നിയന്ത്രണത്തിലുള്ള ഗ്വാണ്ടനാമോ ബേ തടങ്കല്‍ പാളയത്തില്‍ പാര്‍പ്പിക്കപ്പെടുകയും ചെയ്തു. ആരുടെ കേസ്സുകളിലും ഇതുവരെ തീര്‍പ്പായിട്ടില്ല. ഏതായാലും, 20 വര്‍ഷം മുന്‍പത്തെ ആ സംഭവത്തിനുശേഷം യുഎസ് ഭരണകൂടം രാജ്യസുരക്ഷയുടെ കാര്യത്തില്‍ മറ്റെന്നത്തേക്കാളും ജാഗരൂകരായി. സുരക്ഷാ സംവിധാനം ആകപ്പാടെ ഉടച്ചുവാര്‍ക്കുകയും ഹോംലാന്‍ഡ് സെക്യൂരിറ്റി എന്നൊരു പുതിയ ഡിപ്പാര്‍ട്ടിനു രൂപം നല്‍കുകയും ചെയ്തു. ഭീകരര്‍ പല തവണ ശ്രമിച്ചുവെങ്കിലും 2001 സെപ്റ്റംബറില്‍ നടന്നതുപോലുള്ള ഒരു സംഭവം പിന്നീടൊരിക്കലും അമേരിക്കയില്‍ ഉണ്ടായതുമില്ല. 

അതേസമയം, അന്നത്തെ ആ സംഭവത്തിനു സാഹചര്യമൊരുക്കിയ ഗുരുതരമായ ഇന്‍റലിജന്‍സ് വീഴ്ചകളെക്കുറിച്ചുള്ള ഓര്‍മ്മകള്‍ 20 വര്‍ഷങ്ങള്‍ക്കു ശേഷവും അമേരിക്കയെ വേട്ടയാടുകയാണ്. ഭീകരര്‍ രാജ്യത്തു നുഴഞ്ഞുകയറിയതായി. സൂചനകള്‍ ലഭിച്ചിട്ടും എന്തുകൊണ്ട് അവരെ പിടികൂടാനോ നിരീക്ഷിക്കാനോ ആരും ശ്രമിച്ചില്ല എന്നതും ഉത്തരമില്ലാത്ത ചോദ്യമായി ഇന്നും ബാക്കിനില്‍ക്കുന്നു. 

ഈ പംക്തിയെക്കുറിച്ചുള്ള അഭിപ്രായങ്ങൾ kobeidulla1234@gmail.com എന്ന മെയിൽ ഐഡിയിൽ പങ്കുവയ്ക്കാം

Content Summary : Vidhesharangom : Twenty years after 9/11, did US win its ‘war on terror’?

തൽസമയ വാർത്തകൾക്ക് മലയാള മനോരമ മൊബൈൽ ആപ് ഡൗൺലോഡ് ചെയ്യൂ
MORE IN VIDESHARANGOM
SHOW MORE
ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.
Video

തമാശയിൽ തുടങ്ങിയത് അനുഗ്രഹമായി | Johny Antony | Candid Talks

MORE VIDEOS
FROM ONMANORAMA