ഫിറോസിന്റെ കൈപുണ്യം രുചിച്ചറിഞ്ഞ് മിഥുൻ; ഒപ്പം ഒരു സർപ്രൈസും!

ഫിറോസ് ചുട്ടിപ്പാറയെ അറിയാത്തവർ കുറവായിരിക്കും. ഡിസൈനർ അടുക്കളയും മൈക്രോവേവ് അവ്നുമൊക്കെ പത്രാസ് കാട്ടിയ യൂട്യൂബ് പാചക ലോകത്തിലേക്കാണ് പാലക്കാട് കല്ലേപ്പുള്ളി ചുട്ടിപ്പാറക്കാരൻ ഫിറോസ് ഒരു കൈലി മുണ്ടും മടക്കി കുത്തി കയറിവന്നത്. ഇപ്പോഴിതാ ഫിറോസിനൊപ്പം ജിമ്മി ഈ വീടിന്‍റെ ഐശ്വര്യം എന്ന സിനിമയിലെ നായകനായ മിഥുൻ രമേശ് എത്തിയിരിക്കുകയാണ്. മിഥുൻ ആളൊരു ഭക്ഷണപ്രിയനുമാണ്.

ഡിസംബര്‍ ആറിന് തീയേറ്ററുകളിലെത്തുന്ന സിനിമയുടെ പ്രചാരണപരിപാടികളുടെ ഭാഗമായാണ് ഈ വേറിട്ട പ്രൊമേഷൻ സിനിമയുടെ അണിയറപ്രവര്‍ത്തകര്‍ ഒരുക്കിയിരിക്കുന്നത്. ലൈവായി ആടിനെ ഗ്രിൽ ചെയ്ത് കഴിക്കുന്ന ഫിറോസിനും കൂട്ടുകാര്‍ക്കും ഒപ്പമാണ് സിനിമയിലെ നായകനായ മിഥുനും പങ്കുചേര്‍ന്നത്. ചിത്രത്തിൽ ജിമ്മി എന്ന് പേരുള്ള ഒരു പട്ടിയാണ് പ്രധാന താരമെന്നും ചിത്രത്തിലെ നായകനായ തന്‍റെ പേരും ജിമ്മി എന്നാണെന്നും മിഥുൻ പറഞ്ഞു. 

മലയാള സിനിമയിൽ ഇതാദ്യമായാണ് ഇത്തരത്തിൽ വ്യത്യസ്തമായ ഒരു പ്രചാരണരീതി പരീക്ഷിക്കുന്നത്. യൂട്യൂബിൽ വൈറലായ ഫുഡ് ബ്ലോഗറിനോടൊപ്പം പുതിയ സിനിമയുടെ വിശേഷങ്ങള്‍ ആളുകളിലേക്ക് എത്തിക്കുന്ന രീതിയിലാണ് ഈ പ്രൊമോഷൻ. നിരവധി കമന്‍റുകളാണ് വീഡിയോയ്ക്ക് താഴെ വന്നിരിക്കുന്നത്. 

ഹോളിവുഡ് സിനിമയിലുൾപ്പെടെ അഭിനയിച്ച് പ്രശസ്തി ലഭിച്ചിട്ടുള്ള സൂപ്പർ ഡോഗ് അഭിനയിക്കുന്ന ആദ്യ മലയാള സിനിമ കൂടിയാണിതെന്നതാണ് സിനിമയുടെ പ്രത്യേകത, പൂർണ്ണമായും ദുബായിയിൽ ചിത്രീകരിച്ച മലയാള സിനിമ കൂടിയാണ് ഈ ചിത്രം.

ദിവ്യ പിള്ളയാണ് ചിത്രത്തിലെ നായിക. സുരാജ് വെഞ്ഞാറമൂട്, ഹരീഷ് കണാരൻ, ജോയ് മാത്യു, ഇടവേള ബാബു, ജോണി ആന്‍റണി, നിർമൽ പാലാഴി, സുനിൽ സുഗത, ശശി കലിംഗ, സുബീഷ് സുധി, നിസാം കാലിക്കറ്റ്, ശ്രീജ രവി, വീണ നായർ, നിഷ മാത്യു തുടങ്ങിയവരാണ് ചിത്രത്തിലെ മറ്റ് അഭിനേതാക്കള്‍.

English Summary: Mithun Ramesh, Firoz Chuttipara, Cooking Vlog