പ്രസില്ലയുടെ പാചകം; ജ്യൂവിഷ് പുതുവർഷ മധുരവുമായി മാർക്ക് സക്കർബർഗ്

പ്രസില്ല തയാറാക്കിയ പുതുവർഷ വിഭവവുമായി മാർക്ക് സക്കർബർഗ്. ജ്യൂവിഷ് കലണ്ടറിലെ പുതുവർഷമാണ് റോഷ് ഹ–ഷന. ഇസ്രായേൽ ജനത പുതുവർഷം ആഘോഷിക്കുന്ന ദിവസമാണിത്.  ഭാര്യ തയാറാക്കിയ തെഗ്​ലാച് എന്ന മധുരപലഹാര ചിത്രം പങ്കുവച്ച് പുതുവർഷ ആശംസകൾ അറിയിച്ചിരിക്കുകയാണ് സക്കർബർഗ്. ചെറിയ പേസ്റ്ററി ബോൾസ് തേൻസിറപ്പിൽ നട്സും ചെറിപ്പഴങ്ങളും ചേർത്താണ് ഈ മധുര പലഹാരം തയാറാക്കുന്നത്.

ജ്യൂവിഷ് കലണ്ടറിലെ പുതുവർഷ ദിനം ഇസ്രായേൽ ജനതയ്ക്ക് ആഘോഷ ദിനമാണ്. തിരികത്തിച്ച് വച്ച് തീൻമേശയിൽ മാതളപ്പഴം,ആപ്പിൾ,തേൻ എന്നിവ വയ്ക്കും. ഈ പഴങ്ങളുടെ ഉൾവശം മാംസളമാണ്. നിറഞ്ഞ സന്തോഷത്തിന്റെ അടയാളമാകട്ടെ പുതുവർഷം എന്ന സന്ദേശമാണ് ഇതിലൂടെ നൽകുന്നത്. പഴങ്ങൾ തേനിൽ മുക്കി കഴിച്ചാണ് ഡിന്നർ ആരംഭിക്കുന്നത്. സൂര്യാസ്തമയത്തോടെ തുടങ്ങുന്ന പുതുവർഷാചരണം പിന്നെ ദിവസം സൂര്യാസ്തമയത്തോടെയാണ് അവസാനിക്കുന്നത്. 

തെഗ്​ലാച് (Teiglach) തയാറാക്കുന്നത് എങ്ങനെയെന്നു നോക്കാം

ചേരുവകൾ

• ഒലിവ് ഓയിൽ – 2 ടേബിൾസ്പൂൺ
• മുട്ട – 3
• മൈദ – 1 കപ്പ്
• ഉപ്പ്, ബേക്കിങ് പൗഡർ – 1/2 ടീസ്പൂൺ

തയാറാക്കുന്ന വിധം

ചേരുവകൾ എല്ലാം നന്നായി യോജിപ്പിച്ച് എടുക്കാം. മാവ് തൂവിയ പ്രതലത്തിൽ കൈകൾ കൊണ്ടു മാവ് നന്നായി യോജിപ്പിച്ച് ഉരുട്ടി എടുക്കണം.

ഈ മാവ് റോളൻ ഉപയോഗിച്ചു നന്നായി പരത്തിയ ശേഷം നീളത്തിലും കുറുകെയും വരഞ്ഞ് ചെറിയ സ്ക്വയർ ഷേപ്പിലാക്കാം. ഓരോന്നും എടുത്ത് 4 കോണുകളും ഉള്ളിലേക്ക് മടക്കിയ ശേഷം ഉരുട്ടിയെടുക്കാം.

ഈ ബോൾസ് ഒലിവ് ഓയിലിൽ മൂന്ന് മിനിറ്റ് വറുത്തെടുക്കണം.

മറ്റൊരു പാനിൽ തേൻ, പഞ്ചസാര, ഇഞ്ചി പേസ്റ്റ്, നാരങ്ങാ നീര് എന്നിവ ചേർത്ത് ചെറുതീയിൽ അഞ്ച് മിനിറ്റ് വയ്ക്കാം. കുറുകി തുടങ്ങുമ്പോൾ വറുത്ത ബോൾസ് ഇതിലേക്ക് ചേർത്ത് 6 മിനിറ്റ് വേവിക്കാം. ഡ്രൈ ഫ്രൂട്ട്സും ചെറീസും ചേർക്കാം. 

English Summary : Shana tova to everyone celebrating Rosh Hashanah : Mark Zuckerberg