തരംഗമായി 8 കിലോയുടെ 'ബാഹുബലി' സമോസ, മുഴുവൻ കഴിച്ചാൽ സമ്മാനം 51,000 രൂപ

സമോസ കഴിക്കാന്‍ എല്ലാവർക്കും ഇഷ്ടമല്ലേ. ഈ മഴക്കാലത്തെ തണുപ്പിൽ നല്ല ചൂട് സമോസ കഴിക്കുന്നതു ആലോചിച്ചു നോക്കൂ. എന്നാൽ കഴിക്കുന്നത് 8 കിലോയുള്ള സമോസയാണെങ്കിലോ? അതേ, 8 കിലോയുള്ള ഭീമൻ 'ബാഹുബലി' സമോസയാണ് ഇപ്പോൾ ഇന്റർനെറ്റിൽ വൈറലായിക്കൊണ്ടിരിക്കുന്നത്. 

ആളുകളുടെ ജനശ്രദ്ധ പിടിച്ചുപറ്റാൻ കാരണം വലുപ്പം മാത്രമല്ല  ഇതൊരു മത്സരം കൂടിയാണ്. ഒറ്റയ്ക്കു ഈ ഭീമൻ സമോസ കഴിച്ചു തീർത്താൽ 51,000 രൂപ സമ്മാനമായി ലഭിക്കും. 

ഉത്തർപ്രദേശിലെ മീററ്റിൽ മധുരപലഹാരക്കടയായ കൗശൽ സ്വീറ്റ്‍സിലാണ് ഭീമൻ സമോസയുള്ളത്. ഉരുളക്കിഴങ്ങ്, കടല, ഡ്രൈ ഫ്രൂട്‌സ്, പനീർ, മസാലകൾ എന്നിവ ചേർത്ത് എണ്ണയിൽ വറുത്തെടുക്കുമ്പോഴേക്കും 8 കിലോ സമോസയായാണ് മുന്നിലെത്തുക. 'ബാഹുബലി' സമോസ ഉണ്ടാക്കുന്നതു കാണാനും നിരവധി ആളുകളാണ് കടയ്ക്കു മുന്നിൽ തടിച്ചുകൂടുന്നത്.

നിരവധിപേർ മത്സരത്തിൽ പങ്കെടുക്കാന്‍ എത്തുന്നുണ്ടെങ്കിലും ഇതുവരെയും ആരും വിജയിച്ചിട്ടില്ലെന്നാണ് കടയുടമ ശുഭം പറയുന്നത്. 10 കിലോയുടെ സമോസയും ഉടൻ  പുറത്തിറക്കാനാണ് തന്റെ തീരുമാനമെന്നും കൂട്ടിച്ചേർത്തു. 

English Summary : A giant 'Baahubali' samosa weighing 8 kilos has gone viral.