ആ ഭക്ഷണം മെസ്സി 2014ൽ ഉപേക്ഷിച്ചു; നെയ്മാറിനും ക്രിസ്റ്റ്യാനോയ്ക്കുമുണ്ട് സൂപ്പർ ഫൂഡ്
Mail This Article
ലോകത്തിലെ ഏറ്റവും മികച്ച കാർ സ്വന്തമായി ഉണ്ടെങ്കിലും നല്ല ഇന്ധനം അല്ല അതിൽ നിറയ്ക്കുന്നതെങ്കിൽ പ്രത്യേകിച്ച് കാര്യമൊന്നുമില്ല എന്ന് പറയാറുണ്ട്. ശരിയല്ലേ? നമ്മുടെ ശരീരവും അതുപോലെത്തന്നെയാണ്. നാം എന്ത് കഴിക്കുന്നോ, അതാണ് നമ്മിൽ പ്രതിഫലിക്കുന്നത്. സാധാരണക്കാരായ ആളുകളുടെ കാര്യത്തിൽ മാത്രമല്ല, ലോകപ്രശസ്തരായ കായികതാരങ്ങളുടെ കാര്യത്തിലും ഇത് ശരിയാണ്. ലോകം കാത്തിരുന്ന ഫുട്ബോൾ മാമാങ്കത്തിന്റെ ആരവം ഖത്തറിൽ കൂടുതൽ ഉച്ചത്തിൽ മുഴങ്ങിക്കൊണ്ടിരിക്കുന്നു. ഡിസംബർ 18 വരെ ലോകത്തിന്റെ കണ്ണുകള് ഒരു ചെറുപന്തിന് പിന്നാലെയാണ്. വിവിധ ഭൂഖണ്ഡങ്ങളിൽ നിന്നുള്ള ചെറുതും വലുതുമായ രാജ്യങ്ങൾ, അവരുടെ മുഴുവൻ സ്വപ്നങ്ങളും കാലിൽ പതിപ്പിച്ച ഒട്ടേറെ സൂപ്പർതാരങ്ങൾ. ലോകം മുഴുവന് ഖത്തറിലേക്ക് ഉറ്റുനോക്കുന്നു. ഒപ്പം മൈതാനത്തെ സൂപ്പർ താരങ്ങളിലേക്കും. 90 മിനുട്ട് മത്സരത്തിൽ നിർത്താതെയെന്ന വണ്ണം ഓടിക്കളിക്കണമെങ്കിൽ ചില്ലറ സ്റ്റാമിനയൊന്നും പോരാ. അതിനു വേണ്ടി പ്രത്യേക ഭക്ഷണവും പരിശീലനവും മസ്റ്റ്. കളിക്കുന്നത് ലോകകപ്പായതിനാൽ ലോകോത്തര നിലവാരത്തിലുള്ള ഫിറ്റ്നസും അത്യാവശ്യം. അതിന് മെസ്സിയായാലും ക്രിസ്റ്റ്യാനോ റൊണാൾഡോ ആയാലും നെയ്മാർ ആയാലും കഠിനമായ പരിശീലനത്തിനൊപ്പം ഏറെ ശ്രദ്ധ നൽകുന്നത് കഴിക്കുന്ന ഭക്ഷണത്തിലാണ്. കളിക്കളത്തിൽ എതിർ താരങ്ങളെ വെട്ടിയൊഴിഞ്ഞ് വെടിയുണ്ട കണക്കിന് പന്ത് പായിക്കാനുള്ള ഊർജം ലഭിക്കുന്നത് അവരുടേതു മാത്രമായ പ്രത്യേക ഭക്ഷണരീതികളിൽ നിന്നാണ്. എന്താണ് ഈ സൂപ്പർ താരങ്ങളുടെ ഭക്ഷണ രീതികളുടെ സീക്രട്ട്? ഇവർ എന്തു ‘സ്പെഷൽ ഫൂഡാണ്’ കഴിക്കുന്നത്? അതവരുടെ ഫിറ്റ്നസിൽ എത്രമാത്രം സഹായിക്കുന്നുണ്ട്? ഇവരെപ്പോലെ സാധാരണക്കാർക്കും ഡയറ്റ് നോക്കാനാകുമോ? വിശദമായി പരിശോധിക്കാം. ലോകകപ്പിലെ ഭക്ഷണ വിശേഷങ്ങളിലേക്ക്...