കുരുമുളകിട്ട നാടൻ ചിക്കൻ സൂപ്പ്

നാട്ടിൻപുറങ്ങളിൽ ഉണ്ടാക്കുന്ന നല്ല ചൂടുള്ള,  കുരുമുളകിട്ട നാടൻ ചിക്കൻ സൂപ്പ്.       

ചേരുവകൾ 

• ചിക്കൻ  - 200 ഗ്രാം
• വെളിച്ചെണ്ണ  - 2 ടേബിൾസ്പൂൺ
• വെളുത്തുള്ളി - 4 
• ഇഞ്ചി - ചെറിയ കഷ്ണം 
• പച്ചമുളക്  - 2
• ചെറിയ ഉള്ളി  - 5-6
• കറിവേപ്പില - ഒരു തണ്ട് 
• ഉപ്പ് - ആവശ്യത്തിന് 
• ചതച്ച കുരുമുളക് -1 ടീസ്പൂൺ
• കുരുമുളക് പൊടി - 1/4 ടീസ്പൂൺ
• ചെറിയ ജീരകം  -1/4 ടീസ്പൂൺ
• മഞ്ഞൾപ്പൊടി -1/4 ടീസ്പൂൺ
• കായപ്പൊടി  - ഒരു നുള്ള് 
• മല്ലിയില - ആവശ്യത്തിന് 
• തേങ്ങാപ്പാൽ -1 1/2 ടേബിൾസ്പൂൺ

തയാറാക്കുന്ന വിധം 

ഒരു മൺ ചട്ടി എടുത്ത് അതിലേക്ക് വെളിച്ചെണ്ണ ഒഴിക്കുക. ചൂടായാൽ വെളുത്തുള്ളി, ഇഞ്ചി, ചെറിയ ഉള്ളി, പച്ചമുളക്, കറിവേപ്പില, എന്നിവ ഇട്ടു നന്നായി വഴറ്റുക. അതിനു ശേഷം ചതച്ച കുരുമുളക്, മഞ്ഞൾപ്പൊടി എന്നിവ ചേർക്കുക. ഇനി ഇതിലേക്ക് ചിക്കൻ ചേർക്കാം. പിന്നെ ആവശ്യത്തിനുള്ള ഉപ്പും വെള്ളവും ചേർത്ത് നന്നായി വേവിക്കുക. ശേഷം അതിലേക്ക് കായപ്പൊടിയും മല്ലിയിലയും ചേർത്ത് നന്നായി കുറുക്കി എടുക്കുക. അടുത്തതായി ഇതിലേക്ക് ജീരകവും കുരുമുളക് പൊടിയും ചേർത്ത്  നന്നായി യോജിപ്പിച്ച് എടുക്കാം. ഇനി തീ ഓഫ്‌ ചെയ്യാം. ഈ സൂപ്പ്  1 1/2 ടേബിൾസ്പൂൺ തേങ്ങാപ്പാലും ചേർത്ത്  ഒരു പാത്രത്തിലേക്ക് ചൂടൊടേ വിളമ്പാം, നാടൻ ചിക്കൻ സൂപ്പ് റെഡി.

English Summary: Nadan Chicken Soup Recipe