ദോശയ്ക്കും ഇഡ്ഡലിക്കും തക്കാളി തേങ്ങ ചമ്മന്തി

ദോശയ്ക്കും ഇഡ്ഡലിക്കും ഒരു പുത്തൻ കൂട്ട് , സാധാരണ ചമ്മന്തി കഴിച്ചു മടുത്തോ എങ്കിൽ ഇത് നിങ്ങളുടെ നാവിനു ഒരു പുത്തൻ അനുഭവം ആയിരിക്കും. അനാവശ്യമായ ഒരു അധിക ചേരുവകളൊന്നും ഇല്ലാത്ത ഈ ചമ്മന്തി. ഒരിക്കൽ കഴിച്ചാൽ വീണ്ടും വീണ്ടും ഉണ്ടാക്കി കഴിക്കും അതാണ് ഈ ചമ്മന്തിയുടെ രുചിക്കൂട്ട്. 

ചേരുവകൾ 

• തക്കാളി  - 2 ഇടത്തരം വലിപ്പം 
• സവാള - 1 ഇടത്തരം വലിപ്പം
• ഇഞ്ചി - ചെറിയ കഷ്ണം 
• വറ്റൽ മുളക് - 3  എണ്ണം 
• വെളിച്ചെണ്ണ - 2 ടേബിൾ സ്പൂൺ 
• ഉപ്പ് - ആവശ്യത്തിന് 
• തേങ്ങാ - 1/2 കപ്പ് ( ഒരു മുറി തേങ്ങയുടെ പകുതി ) 

താളിക്കാൻ 

• എണ്ണ - 1 ടീ സ്പൂൺ 
• കടുക് - 1/2 സ്പൂൺ 
• കറിവേപ്പില - ആവശ്യത്തിന് 
• വറ്റൽ മുളക് - 2 എണ്ണം

തയാറാക്കുന്ന വിധം

• പാൻ ചൂടാക്കി വെളിച്ചെണ്ണ ഒഴിക്കുക. ഇതിലേക്ക് (ഉണക്ക) മുളക് ഇട്ട് മൂപ്പിക്കുക. അതിനുശേഷം സവാള അരിഞ്ഞതും ഇഞ്ചി ചെറുതായി അരിഞ്ഞതും ചേർത്ത് വഴറ്റുക. 
• സവാള വഴറ്റിക്കഴിഞ്ഞാൽ തക്കാളി ചെറുതായി അരിഞ്ഞത് ചേർത്ത് പച്ചമണം മാറുന്നത് വരെ വഴറ്റുക, അതിനുശേഷം മറ്റൊരു പാത്രത്തിലേക്ക് മാറ്റി തണുപ്പിക്കുക. 
• തണുത്ത ശേഷം ചിരകിയ തേങ്ങയും ഉപ്പും അല്പം വെള്ളവും ചേർത്ത് അരച്ചെടുക്കുക. 
• കടുക് താളിച്ച ശേഷം  വിളമ്പാവുന്നതാണ് , ദോശയ്ക്കും ഇഡ്ഡലിക്കും ഒപ്പം വിളമ്പാവുന്നതാണ്.