ഉള്ളം കുളിര്പ്പിക്കും കണ്ണൂരിന്റെ സ്വന്തം കക്കരിക്കാ പെരക്ക്
Mail This Article
വളരെ പെട്ടെന്ന് തയാറാക്കാവുന്ന നല്ല ഹെല്ത്തിയായിട്ടുള്ള ഒരു കറിയാണ് ഇത്. താളിച്ച് ചേര്ക്കാന് മാത്രമേ സ്റ്റൗ ഓണ് ചെയ്യേണ്ടതുള്ളൂ. അതുകൊണ്ട് തന്നെ സാലഡ് വെള്ളരിക്കയുടെയും തൈരിന്റെയും പോഷകമൂല്യങ്ങളും കുളിര്മയും ഒട്ടും നഷ്ടപ്പെടുന്നുമില്ല.
ചേരുവകള്
കക്കരിക്ക - 2 എണ്ണം
തേങ്ങ ചിരകിയത് - 1/2 കപ്പ്
പച്ചമുളക് - 2 എണ്ണം
കടുക് - 1/4 ടീസ്പൂണ്
അധികം പുളിയില്ലാത്ത കട്ടത്തൈര് - 1 കപ്പ്
ഉപ്പ് - ആവശ്യത്തിന്
തയാറാക്കുന്ന വിധം
• കക്കരിക്ക തോലുകളഞ്ഞ് പൊടിയായി അരിഞ്ഞെടുക്കുക. ഇതില് കുറച്ച് ഉപ്പ് ചേര്ത്ത് നന്നായി യോജിപ്പിച്ച് 1/2 മണിക്കൂര് മാറ്റി വയ്ക്കുക.
• തേങ്ങാ ചിരകിയതും പച്ചമുളകും കൂടി ഒതുക്കിയെടുക്കുക. ഇതിലേക്ക് കടുക് ചേര്ത്ത് മിക്സിയില് ഒന്നുകൂടി കറക്കിയെടുക്കുക.(കടുക് ഒട്ടും അരയരുത്. ചെറുതായി പൊട്ടുന്നതാണ് ശരിയായ പാകം. കല്ലില് വച്ചും ചതച്ചെടുക്കാം)
• ഇനി അരിഞ്ഞ് ഉപ്പ് ചേര്ത്ത് വച്ച കക്കരിക്കയിലേക്ക് തേങ്ങ ഒതുക്കിയെടുത്തതും നന്നായി ഉടച്ചെടുത്ത തൈരും ചേര്ത്ത് യോജിപ്പിക്കണം. ഉപ്പ് കുറവുണ്ടെങ്കില് ചേര്ത്ത് കൊടുത്തതിനു ശേഷം കടുകും ഉണക്ക മുളകും കറിവേപ്പിലയും കുറച്ച് വെളിച്ചെണ്ണയില് താളിച്ച് ചേര്ക്കാം.
• വളരെ രുചികരമായ പെരക്ക് കറി റെഡി.
English Summary : Salad Cucumber Curry