കണ്ണൂർ സ്പെഷൽ വെള്ളപോളയും പഴം സ്റ്റ്യൂവും

കണ്ണൂരുകാരുടെ സ്പെഷൽ വിഭവമാണ്  വെള്ള പോളയും പഴം സ്റ്റ്യൂവും. ഏകദേശം വട്ടയപ്പം പോലെ ഇരിക്കുമെങ്കിലും തയാറാക്കുന്ന രീതിയിൽ അല്പം വ്യത്യാസമുണ്ട്. നോൺ വെജ് കറി കൂട്ടി കഴിക്കാനും വളരെ നല്ലൊരു വിഭവമാണിത്.

ചേരുവകൾ 

• പച്ചരി - ഒരു കപ്പ്
• വെള്ള പുഴുക്കലരി - ഒരു കപ്പ്
• പപ്പടം - 3
• തേങ്ങാ വെള്ളം - ഒന്നരക്കപ്പ്
• തേങ്ങ ചിരകിയത് - അര കപ്പ്
• യീസ്റ്റ് - അര ടീസ്പൂൺ
• പഞ്ചസാര - അഞ്ച് ടേബിൾ സ്പൂൺ
• ഉപ്പ് - ആവശ്യത്തിന്

പഴംസ്റ്റൂവിന് ആവശ്യമുള്ള ചേരുവകൾ

• ഞാലിപ്പൂവൻ പഴം - 4 എണ്ണം
• പഞ്ചസാര - 2 ടേബിൾസ്പൂൺ
• ഏലക്കാപ്പൊടി - കാൽ ടീസ്പൂൺ
• കട്ടി തേങ്ങാപ്പാൽ - അരക്കപ്പ്

തയാറാക്കുന്ന വിധം

• പച്ചരിയും പുഴുങ്ങലരിയും നന്നായി കഴുകി 8 മണിക്കൂർ വെള്ളത്തിൽ കുതിർത്ത് വയ്ക്കുക. പുഴുക്കലരി ചൂടുവെള്ളത്തിൽ വേണം കുതിർത്തു വയ്ക്കാൻ.
• അരയ്ക്കുന്നതിന് 10 മിനിറ്റ് മുൻപായി പപ്പടം ചെറിയ കഷണങ്ങളാക്കി കുതിർത്തു വച്ചിരിക്കുന്ന പച്ചരിയിൽ ചേർക്കുക.
• അരക്കപ്പ് തേങ്ങാവെള്ളത്തിൽ  യീസ്റ്റ്, 3 ടേബിൾ സ്പൂൺ പഞ്ചസാര, ഉപ്പ് ഇവ യോജിപ്പിക്കുക.
• പുഴുക്കലരിയിലേക്ക് തേങ്ങ ചിരകിയതും തേങ്ങാവെള്ളവും ചേർത്ത് നല്ല മയത്തിൽ അരച്ചെടുക്കുക.
• പച്ചരിയും പപ്പടവും കുതിർത്തതും യീസ്റ്റും തേങ്ങ വെള്ളത്തിൽ കുതിർത്തതും ചേർത്ത് നന്നായി അരച്ചെടുക്കുക.
• രണ്ടു മാവും കൂടി ഒന്നിച്ചാക്കി പഞ്ചസാരയും ഉപ്പും ആവശ്യമുണ്ടെങ്കിൽ ചേർത്ത് നന്നായി യോജിപ്പിച്ചു വയ്ക്കുക. അഞ്ചു മുതൽ ആറു മണിക്കൂർ കൊണ്ട് ഈ മാവ് നന്നായി പതഞ്ഞ് പൊങ്ങിവരും.
• ഒരു സ്റ്റീൽ പ്ലേറ്റിൽ നെയ്യ് പുരട്ടിയ ശേഷം പതഞ്ഞ മാവ് മെല്ലെ കോരിയൊഴിക്കുക. 10 മുതൽ 15 മിനിറ്റ് വരെ ആവിയിൽ വേവിച്ചെടുക്കുക. തണുക്കുമ്പോൾ ഇഷ്ടമുള്ള ആകൃതിയിൽ മുറിച്ചെടുക്കാം.
• പഴം സ്റ്റൂ ചേർത്താണ് വെള്ള പോള കഴിക്കുന്നത്. പഴം ചെറിയ കഷണങ്ങളാക്കി പഞ്ചസാരയും ഏലക്കാപ്പൊടിയും ചേർത്ത് നന്നായി ഉടയ്ക്കുക. ഇതിലേക്ക് തേങ്ങാപ്പാൽ ചേർത്ത് യോജിപ്പിക്കുക. കഴിക്കുന്നതിന് തൊട്ടുമുൻപ് സ്റ്റ്യൂ തയാറാക്കാം.

English Summary : Traditional Vella Pola and Pazham Stew Recipe.