ഇരട്ടി രുചിയിൽ ചെമ്മീൻ മാങ്ങാ കറി

ഇടവപ്പാതിയുടെ തണുപ്പിനേയും കോവിഡുകാല അടച്ചിരുപ്പിനേയും പ്രതിരോധിക്കാനായി രുചിയേറും ചെമ്മീൻ കറിയാവട്ടെ ഇന്ന്. മുരിങ്ങക്കായയും പച്ചമാങ്ങയും കൂടി ചേരുമ്പോൾ അതിന്റെ രുചി ഇരട്ടിക്കുന്നു

ചേരുവകൾ:

• കുടംപുളി - 5-6 എണ്ണം (അര മണിക്കൂർ വെള്ളത്തിൽ കുതിർത്തത്)
• പച്ചമുളക് - 5 എണ്ണം (ചെറു കഷ്ണങ്ങളാക്കിയത്)
• ഇഞ്ചി - വലിയ ഒരു കഷ്ണം ചതച്ചത്
• ചെറിയ ഉള്ളി - 8-9 എണ്ണം
• പച്ചമാങ്ങ - വലിയ കഷ്ണം (നുറുക്കിയത്)
• മുരിങ്ങക്കായ - 2 എണ്ണം (കഷ്ണങ്ങളാക്കിയത്)
• തേങ്ങാപ്പാൽ - 1 1/2 കപ്പ് (രണ്ടാം പാൽ)
• ഉപ്പ് - 1 ടീ സ്പൂൺ
• മുളകുപൊടി - 1 1/2 ടീസ്പൂൺ
• മഞ്ഞൾപ്പൊടി - 1/4 ടീസ്പൂൺ
• മല്ലിപ്പൊടി - 1 1/2 ടീ സ്പൂൺ
• ചെമ്മീൻ- 1/4 കി.ഗ്രാം(കഴുകി വൃത്തിയാക്കിയത്)

തയാറാക്കുന്ന വിധം

• മേൽപറഞ്ഞ ചേരുവകൾ ഒരു മൺ ചട്ടിയിലിട്ട് വെള്ളമൊഴിച്ച് തിളപ്പിച്ച ശേഷം,അതിലേക്ക് രണ്ടാം പാൽ,ഉപ്പ്,മുളക്, മഞ്ഞൾ പൊടികൾ ചേർത്ത് 2-3 മിനിറ്റ് തിളപ്പിക്കുക.അതിലേക്ക് മല്ലിപൊടി കൂടി ചേർത്ത് ഒരു മൂടിയാൽ അടച്ച് വെച്ച് 7-8 മിനിറ്റ് വേവിക്കുക.അതിലേക്ക് ചെമ്മീൻ കൂടി ചേർത്തിളക്കി 5 മിനിറ്റ് കൂടി അടച്ച് വെച്ച് വേവിക്കുക. ഒന്നാം പാൽ കൂടി ചേർത്ത് വാങ്ങി വെക്കുക.
• ഒരു ചീനച്ചട്ടിയിൽ 1 ടേബിൾ സ്പൂൺ വെളിച്ചെണ്ണ ചൂടാക്കി,ചെറിയ ഉള്ളി അരിഞ്ഞതും (10-12 എണ്ണം),വറ്റൽ മുളകും(2 എണ്ണം കഷ്ണങ്ങളാക്കിയത്),കരിവേപ്പിലയും ചേർത്ത് വഴറ്റി, വാങ്ങിവെച്ച ചെമ്മീൻ കറിയിൽ ചേർക്കുക.
• ചൂട് ചോറിനോടൊപ്പമോ,ചപ്പാത്തിയുടെ കൂടെയോ ഈ ചെമ്മീൻ കറി ഏറെ ആസ്വദിച്ച് കഴിക്കാം.

English Summary : Kerala Style Prawns Mango curry.