ഒരു കപ്പ് പാൽപ്പൊടി ഉപയോഗിച്ച് എളുപ്പത്തിൽ ഗുലാബ് ജാമുൻ

കുട്ടികൾക്കും മുതിർന്നവർക്കും ഏറെ ഇഷ്ടമുള്ള മധുര പലഹാരമാണ് ഗുലാബ് ജാമുൻ. ഒരു കപ്പ് പാൽ പൊടിയും മൈദയും ഉപയോഗിച്ച് ഉണ്ണിയപ്പകാരയിൽ എളുപ്പത്തിൽ ഗുലാബ് ജാമുൻ തയാറാക്കി എടുക്കാം.

ചേരുവകൾ

• പാൽപ്പൊടി - ഒരു കപ്പ്
• മൈദ - കാൽ കപ്പ്
• ബേക്കിങ് പൗഡർ- അര ടീസ്പൂൺ
• നെയ്യ് - 3 ടേബിൾ സ്പൂൺ
• പാൽ - കാൽകപ്പ് + 3 ടേബിൾസ്പൂൺ
• പഞ്ചസാര - ഒരു കപ്പ്
• വെള്ളം - രണ്ട് കപ്പ്
• നാരങ്ങാനീര് - ഒരു മുറി നാരങ്ങയുടെ
• റോസ് വാട്ടർ - അര ടീസ്പൂൺ
• ഏലക്കാപ്പൊടി - ഒരു ടീസ്പൂൺ
• കുങ്കുമപ്പൂവ് - കാൽടീസ്പൂൺ
• നെയ്യ്/ എണ്ണ - വറുക്കാൻ ആവശ്യത്തിന്

തയാറാക്കുന്ന വിധം

• പാൽപ്പൊടി, മൈദ, ബേക്കിങ് പൗഡർ, നെയ്യ് ഇവ ഒരു ബൗളിൽ എടുത്ത് കൈ കൊണ്ട് നന്നായി തിരുമ്മി യോജിപ്പിക്കുക. ഇതിലേക്ക് പാൽ ഒഴിച്ച് കട്ടിയിൽ കുഴച്ചെടുക്കുക. അടച്ച് 15 മിനിറ്റ് മാറ്റി വയ്ക്കുക.
• ചുവടു കട്ടിയുള്ള ഒരു  പാത്രത്തിൽ പഞ്ചസാര, വെള്ളം, നാരങ്ങാനീര് ,റോസ് വാട്ടർ, ഏലയ്ക്കാപ്പൊടി, കുങ്കുമപ്പൂവ് ഇവ ഒന്നിച്ചാക്കി ഏഴ് മിനിറ്റ് തിളപ്പിക്കുക. നന്നായി തിളച്ചു കഴിയുമ്പോൾ അടച്ചുവയ്ക്കുക. പഞ്ചസാര പാനിയുടെ ചൂട് മാറരുത്.
• തയാറാക്കിവച്ച മാവിനെ 20 ചെറിയ ഉരുളകളാക്കി എടുക്കുക. ഉരുള പിടിക്കാൻ ബുദ്ധിമുട്ടുണ്ടെങ്കിൽ അല്പം പാൽ കൂടി ചേർത്ത് കുഴച്ച് എടുക്കാവുന്നതാണ്.
• ഒരു ഉണ്ണിയപ്പ കാര ചൂടാക്കി ഓരോ കുഴിയിലും മുക്കാൽഭാഗം നെയ്യൊഴിക്കുക. നെയ് നന്നായി ചൂടായ ശേഷം തീ കുറച്ച്  തയാറാക്കി വച്ച ഉരുളകൾ ബ്രൗൺ നിറത്തിൽ വറുത്തെടുക്കുക.
• ചൂടോടുകൂടി തന്നെ പഞ്ചസാരപ്പാനിയിലേക്ക്  ഇടുക. പഞ്ചസാരപ്പാനി ചെറുതായി ഒന്ന് ഇളക്കി കൊടുക്കുക.
  
• 15 മിനിറ്റ് അടച്ച് വെക്കുക. രുചികരമായ ഗുലാബ് ജാമുൻ തയാർ.

English Summary : Milk Powder Gulab Jamun.