വായിലിട്ടാൽ അലിഞ്ഞുപോകുന്ന പെർഫക്റ്റ് ഗോതമ്പ് ഹൽവ

ഒരുപാട് ഔഷധഗുണങ്ങളുള്ള കരുപ്പെട്ടി ചേര്‍ത്ത്, ബേക്കറിയില്‍ നിന്നും കിട്ടുന്ന അതേ രുചിയില്‍ ഒരു ഹെല്‍ത്തി ഗോതമ്പ് ഹൽവ തയാറാക്കുന്നതെങ്ങനെയെന്ന് നോക്കാം.

ചേരുവകൾ

• ഗോതമ്പ് പൊടി- 1 കപ്പ്
• കരുപ്പട്ടി /ശർക്കര - 250 ഗ്രാം
• വെള്ളം - 2 1/2 കപ്പ്
• നെയ്യ് - 4-5 ടേബിൾസ്പൂൺ
• ഏലയ്ക്കാപ്പൊടി - 1/2 ടീസ്പൂൺ
• ഉപ്പ് - ഒരു നുള്ള്
• കശുവണ്ടിപരിപ്പ് - 10-12 എണ്ണം

തയാറാക്കുന്ന വിധം

•  കരുപ്പട്ടി /ശർക്കര 1/2 കപ്പ് വെള്ളമൊഴിച്ച് ഉരുക്കി പാനിയാക്കി, അരിച്ച് തണുക്കാന്‍ മാറ്റി വയ്ക്കുക.

•  ഹല്‍വ റെഡിയാകുമ്പോള്‍ സെറ്റ് ചെയ്യാനുള്ള മോള്‍ഡ് നെയ്യ് പുരട്ടി തയാറാക്കി വയ്ക്കുക.

•  അടുത്തതായി ഗോതമ്പ് പൊടിയിലേക്ക് രണ്ട് കപ്പ് വെള്ളമൊഴിച്ച് ഒട്ടും കട്ടയില്ലാതെ നന്നായി ഇളക്കി യോജിപ്പിക്കുക. അതിനുശേഷം ഇത് അരിച്ചെടുക്കണം.

•  ഒരു പാന്‍ സ്റ്റൗവിൽ വച്ച് ചൂടാകുമ്പോള്‍ 2 ടേബിള്‍സ്പൂണ്‍ നെയ്യ് ചേര്‍ത്ത് അണ്ടിപരിപ്പ് ഗോള്‍ഡന്‍ ബ്രൗണ്‍ നിറത്തില്‍ വറുത്ത് വയ്ക്കുക.

•  ഇനി അരിച്ചെടുത്ത കൂട്ട് ചൂടാറിയ ശര്‍ക്കര പാനിയുമായി യോജിപ്പിച്ച് അണ്ടിപ്പരിപ്പ് വറുത്ത് വച്ച പാനിലേക്ക് ഒഴിക്കുക.

•  ശേഷം സ്റ്റൗ ഓണ്‍ ചെയ്ത് മീഡിയം തീയില്‍ കൈയെടുക്കാതെ വരട്ടിയെടുക്കുക. ഇടയ്ക്കിടെ നെയ്യ് ചേർത്ത് കൊടുക്കാം. 20 മിനിറ്റിനുള്ളില്‍ നന്നായി കുറുകി വരും. ഈ സമയത്ത് വറുത്ത് മാറ്റി വെച്ച അണ്ടിപ്പരിപ്പും, ഏലയ്ക്കാപ്പൊടിയും ഉപ്പും 1/2 ടേബിള്‍ സ്പൂണ്‍ നെയ്യും ചേര്‍ത്ത് നന്നായി യോജിപ്പിച്ചെടുക്കുക. സ്പൂണില്‍ കോരിയെടുത്ത് കഴിക്കാന്‍ ഇഷ്ടമുള്ളവര്‍ക്ക് ഈ സമയത്ത് സ്റ്റൗ ഓഫ് ചെയ്ത് മോള്‍ഡിലേക്ക് മാറ്റാം.

•  മീഡിയത്തിനും ലോയ്ക്കും ഇടയില്‍ തീ ക്രമീകരിച്ച്, 5 മിനിറ്റ് കൂടി വരട്ടിയെടുത്താല്‍ മുറിച്ചെടുത്ത് കഴിക്കാനുള്ള പാകത്തില്‍ കിട്ടും.

• തയാറാക്കി വച്ച മോള്‍ഡിലേക്ക് മാറ്റി നെയ്യ് തടവിയ സ്പൂണ്‍ വച്ച് നിരപ്പാക്കി കൊടുക്കുക. നന്നായി തണുത്ത ശേഷം മോള്‍ഡില്‍ നിന്നും പുറത്തെടുത്ത് മുറിച്ചെടുക്കാം.

• ബേക്കറിയില്‍ നിന്നും കിട്ടുന്ന പോലുള്ള പെര്‍ഫെക്റ്റ് ഹല്‍വ റെഡി. 

English Summary : Instant Wheat Jaggery Halwa Recipe