കൊതിയൂറും നാടൻ ഇടിച്ചക്ക തോരൻ

പൊടി പൊടിയായി തയാറാക്കാൻ പറ്റുന്ന ഉഗ്രൻ ഇടിച്ചക്ക തോരൻ, ചോറിനൊപ്പം സൂപ്പർ രുചിയിൽ.

ചേരുവകൾ 

• ഇടിച്ചക്ക - 500 ഗ്രാം 
• തേങ്ങ - 1 മുറി (ചിരകിയത്)
• കാന്താരി മുളക് - 4 - 6 എണ്ണം 
• പച്ചമുളക് - 1 എണ്ണം 
• വെളുത്തുളളി - 4 എണ്ണം 
• ഉപ്പ് 
• മഞ്ഞൾപ്പൊടി - 1 ടീസ്പൂൺ 
• വെള്ളം - 1 കപ്പ് 
• കടുക് - 1/ 2 ടീസ്പൂൺ
• വറ്റൽ മുളക് - 2 എണ്ണം 
• കറിവേപ്പില 
• ഉഴുന്ന് പരിപ്പ് - 2 ടേബിൾസ്പൂൺ
• മട്ട അരി വറത്തു പൊടിച്ചത് - 2 ടീസ്പൂൺ 
• വെളിച്ചെണ്ണ - 2 ടേബിൾസ്പൂൺ

തയാറാക്കുന്ന വിധം 

• ഇടിച്ചക്ക തൊലി ചെത്തി, ചെറിയ കഷ്ണങ്ങളാക്കി മുറിച്ച്  ഉപ്പും മഞ്ഞൾപ്പൊടിയും വെള്ളവും ചേർത്ത് മീഡിയം തീയിൽ അടച്ചു വച്ച് വേവിച്ചെടുക്കാം. ചക്ക മുക്കാൽ വേവ് ആകുമ്പോൾ തീ അണച്ച് വെള്ളം ഊറ്റി ചൂട് ആറാനായി മാറ്റി വയ്ക്കാം.
• ചൂടാറിയ ചക്ക കഷ്ണങ്ങൾ മിക്സിയുടെ ചെറിയ ജാറിൽ ഇട്ടു ചതച്ച് എടുക്കാം.
• തേങ്ങ ചിരകിയത് വെളുത്തുള്ളിയും കാന്താരി മുളകും പച്ചമുളകും ഒരു നുള്ള് ഉപ്പും ചേർത്തു ചതച്ച് എടുക്കാം.
• ഒരു ഫ്രൈയിങ് പാനിൽ വെളിച്ചെണ്ണ ഒഴിച്ച് ചൂടായി വരുമ്പോൾ കടുക് പൊട്ടിച്ചെടുക്കാം. ശേഷം കറിവേപ്പിലയും വറ്റൽ മുളകും ഉഴുന്നു പരിപ്പും വറുത്ത് എടുക്കാം. ചതച്ച ചക്കയും അരപ്പും കൂടി ചേർത്തു നന്നായി ഇളക്കി യോജിപ്പിച്ച ശേഷം ചെറുതീയിൽ അടച്ചു വയ്ക്കാം. 
• 2 മിനിറ്റിനു ശേഷം തുറന്നു കുറച്ച് കറിവേപ്പിലയും വറുത്തു പൊടിച്ച അരിപ്പൊടി കൂടി ചേർത്ത് ഇളക്കി യോജിപ്പിച്ചാൽ രുചികരമായ ഇടിച്ചക്ക തോരൻ തയാറായി.

English Summary : Tender Jackfruit Stir Fry.