പ്രസവ രക്ഷയ്ക്ക് ഉള്ളി ലേഹ്യം വീട്ടിൽ തയാറാക്കാം

ആരോഗ്യഗുണങ്ങൾ ധാരാളമുള്ള ലേഹ്യം, പ്രസവ രക്ഷയ്ക്ക് വീട്ടിൽ എളുപ്പത്തിൽ ഒരുക്കാം.

ചേരുവകൾ

• ചെറിയ ഉള്ളി - 2 കിലോഗ്രാം
• ഉള്ളി ലേഹ്യത്തിനായുള്ള മരുന്നു (കടയിൽ കിട്ടും )- വെള്ളത്തിൽ കുതിർക്കുക (അതിലെ ഉണക്ക ചുക്കും മഞ്ഞളും മാറ്റി വയ്ക്കണം )
• ശർക്കര - ഒരു വലിയ ഉണ്ട
• തേങ്ങാപ്പാൽ - രണ്ടു തേങ്ങയിൽ നിന്ന്
• നല്ലെണ്ണ - 1/2 ലിറ്റർ
• നെയ്യ് - 1/2 ലിറ്റർ 

തയാറാക്കുന്ന വിധം

• ചെറിയ ഉള്ളി വെള്ളം ചേർക്കാതെ പ്രഷർ കുക്കറിൽ ഒരു വിസിൽ വരുന്നതുവരെ വേവിക്കുക.
• ശർക്കര കുറച്ച് വെള്ളം ചേർത്ത് ഉരുക്കി എടുക്കുക.
• ഒരു ഉരുളിയിൽ ശർക്കരപ്പാനി അരിച്ചു ഒഴിക്കുക, ഇതിലേക്കു കുഞ്ഞുള്ളി വേവിച്ചത് ചേർക്കുക.
• കുതിർത്ത ഉള്ളി ലേഹ്യം മരുന്നു തേങ്ങാപ്പാൽ ചേർത്ത് അരച്ച് ഉരുളിയിലേക്ക് ഒഴിക്കുക, ബാക്കി തേങ്ങാപ്പാലും.
• ഇടത്തരം തീയിൽ തുടരെ ഇളക്കുക.
• കുറുകാൻ തുടങ്ങുമ്പോൾ ഇതിലേക്കു ഉണക്ക ചുക്കും മഞ്ഞളും പൊടിച്ചു ചേർക്കുക.
• ഇതിലേക്കു നല്ലെണ്ണ കുറേശ്ശേ ചേർത്തിളക്കുക. അതിനു ശേഷം നെയ്യും കുറേശ്ശേ ചേർത്ത് ഇളക്കുക.
• നന്നായി കുറുകി നിറം മാറി എണ്ണ തെളിഞ്ഞു വരുമ്പോൾ തീ ഓഫ്‌ ചെയ്യുക.
• ചൂടാറിയ ശേഷം പാത്രത്തിൽ അടച്ചു വയ്ക്കാം. പ്രസവ ശേഷം രണ്ടു നേരം ഓരോ വലിയ ടേബിൾസ്പൂൺ വീതം ഉള്ളി ലേഹ്യം കഴിക്കുക. വിളർച്ച മാറാൻ നല്ലതാണ്.

English Summary : The shallots lehyam is mainly used as a medicine to relax the woman’s body after delivery.