കാട്ടു ചീരകൊണ്ട് ഊണിനൊരുക്കാം സൂപ്പർ രുചിയിലൊരു എരിശ്ശേരി

വീട്ടുമുറ്റത്ത് വളരെ എളുപ്പത്തിൽ വളരുന്ന കാട്ടു ചീര കൊണ്ട് ടേസ്റ്റി എരിശ്ശേരി തയാറാക്കുന്നത് എങ്ങനെയെന്നു നോക്കാം.

ചേരുവകൾ

• കാട്ടു ചീര - 1 പിടി 
• വറുത്ത ചെറുപയർ പരിപ്പ് - 100 ഗ്രാം  
• ചിരകിയ തേങ്ങാ - 1 ബൗൾ 
• ജീരകം - അര ടീസ്പൂൺ
• മഞ്ഞൾപ്പൊടി - ഒരു ടീസ്പൂൺ
• മുളകുപൊടി - ഒരു ടീസ്പൂൺ
• കടുക് - ഒരു ടീസ്പൂൺ
• കറിവേപ്പില - 7 എണ്ണം 
• ചുവന്ന മുളക് - 2 എണ്ണം  
• വെളിച്ചെണ്ണ - ഒന്നര ടേബിൾ സ്പൂൺ  

തയാറാക്കുന്ന വിധം

കാട്ടു ചീര നന്നായി കഴുകിയതിനു ശേഷം വളരെ ചെറുതായി അരിയുക. അര ടീ സ്പൂൺ മഞ്ഞൾപ്പൊടി ഇട്ടു ചെറുപയർ പരിപ്പ് കുക്കറിൽ വേവിക്കുക. വെന്ത പരിപ്പിലേക്കു ചീരയും ഉപ്പും മുളകുപൊടിയും അര ടീ സ്പൂൺ മഞ്ഞൾപ്പൊടിയും ചേർത്ത് ഇളക്കുക. ഇത് പ്രഷർ കുക്കറിൽ ഒരു വിസിൽ മാത്രം അടിച്ചു വേവിക്കുക.

തേങ്ങാ, ജീരകം എന്നിവ മിക്സിയിൽ അരച്ച് എടുക്കാം. അരച്ച തേങ്ങ വേവിച്ചു വച്ച പരിപ്പ് – ചീര കൂട്ടിൽ ചേർത്തു നന്നായി യോജിപ്പിക്കുക. ആവശ്യത്തിന് വെള്ളം ചേർത്തു തിളയ്ക്കുന്നതു വരെ ഇളക്കുക. 

വെളിച്ചെണ്ണ ചൂടാക്കി കടുകും കറിവേപ്പിലയും മുളകും വറുത്തിടാം.

Content Summary : Spinach curry recipe kerala style.