പ്രകൃതിയിലെ ഡിഎൻഎ സൂപ്പ്

വനത്തിലെ ഒരു പിടി മണ്ണോ കടലിലെ ഒരു കുമ്പിൾ വെള്ളമോ പരിശോധിച്ച് അവിടെ കഴിയുന്ന ജീവികൾ ഏതൊക്കെയാണെന്ന് കണ്ടെത്താനായാലോ. ‘പരിസ്ഥിതി ഡിഎൻഎ’ അഥവാ ഇ– ഡിഎൻഎ (environmental DNA- eDNA) ഉപയോഗിച്ച് ജീവികളുടെ വൈവിധ്യം കണ്ടെത്തുന്ന ഈ രീതി വിസ്മയങ്ങൾ സൃഷ്ടിക്കുകയാണ്.

∙എന്താണ് ഇ- ഡിഎൻഎ 
ജീവജാലങ്ങൾ ചുറ്റുപാടും ജനിതക മുദ്രകൾ അവശേഷിപ്പിക്കുന്നുണ്ട്. അത് മണ്ണിലാവാം, കുടിക്കുകയോ കുളിക്കുകയോ കഴിയുകയോ ചെയ്യുന്ന ജലാശയങ്ങളിലാവാം, മഞ്ഞിലാവാം,  പൊടിപടലങ്ങളിൽ പോലുമാകാം. പൊഴിയുന്ന ചർമകോശങ്ങൾ, കഫം, ഉമിനീർ, ബീജം തുടങ്ങിയ ശരീരസ്രവങ്ങൾ, കാഷ്‌ഠം, മൂത്രം, രക്തം, മൃതശരീരം എന്നിവയൊക്കെ ഇ-ഡിഎൻഎയുടെ സ്രോതസ്സുകളാണ്. ഇത്തരം അവശിഷ്ടങ്ങളിലുള്ള കോശങ്ങളിലും സംയുക്ത കോശങ്ങളുടെ തുണ്ടുകളിലും  ഇവയൊക്കെ അടിഞ്ഞുകൂടുന്ന ബാക്റ്റീരിയകളുടെ  പാടകളിലുമൊക്കെ (bacterial biofilm) ഇ-ഡിഎൻഎ കാണപ്പെടും. ഇ- ഡിഎൻഎ വേർതിരിക്കുന്നതിനും അപഗ്രഥിക്കുന്നതിനുമുള്ള ശാസ്ത്രീയ രീതികൾ ഇപ്പോൾ വികസിപ്പിച്ചിട്ടുണ്ട്. മാതാപിതാക്കളിൽ നിന്ന് പാരമ്പര്യമായി ലഭിക്കുന്ന ബയോളജിക്കൽ കോഡാണല്ലോ ഡിഎൻഎ. ഇ-ഡിഎൻഎ പരിശോധനയിലൂടെ ആ പ്രദേശത്തുള്ള സസ്തനികൾ മുതൽ സൂക്ഷ്മജീവികളുടെ വരെയുള്ളവരുടെ സാന്നിധ്യം വെളിപ്പെടുന്നു.

∙ഇലയിലൊളിപ്പിച്ച കാട് 
വന്യജീവികൾ നിക്ഷേപിക്കുന്ന സ്രവങ്ങളും ത്വക് കോശങ്ങളുമൊക്കെ വായുവിൽ തങ്ങിനിൽക്കുന്നു. അവ പിന്നീട് ഇലകളിലും മണ്ണിലുമൊക്കെ അടിയും. കൂടാതെ, ശരീരം ഉരസുമ്പോഴും അതൊക്കെ ഇലകളിൽ പറ്റിപ്പിടിക്കാൻ ഇടയുണ്ട്. അങ്ങനെ ഇലകളുടെ പ്രതലം ഇ -ഡിഎൻഎയുടെ നല്ല സ്രോതസ്സായി മാറുന്നു. യുഗാണ്ടയിലെ ഗവേഷകർ 'ചിവാലെ’ വന്യജീവിസങ്കേതത്തിലെ വ്യത്യസ്ത ഭാഗങ്ങളിൽനിന്ന്, ഇലകളിൽ പറ്റിപ്പിടിച്ചിരിക്കുന്ന പൊടിപടലങ്ങൾ സ്വാബ് ഉപയോഗിച്ച് ശേഖരിച്ചു. തുടർന്ന് ഇ-ഡിഎൻഎ വേർതിരിച്ച് പഠനവിധേയമാക്കി. ഇതിലൂടെ 50 ജീവിവർഗങ്ങളുടെ (genera) സാന്നിധ്യം നിർണയിക്കാൻ കഴിഞ്ഞു. ചിലതിനെ സ്പീഷീസ് തലത്തിൽപോലും തിരിച്ചറിയാനായി. വർഷങ്ങൾ എടുത്ത് നിർണയിക്കേണ്ട ഇക്കാര്യം ഇ -ഡിഎൻഎ പരിശോധനയിലൂടെ പെട്ടെന്ന് സാധ്യമായി. 

∙സർവയിടത്തും ഇ-ഡിഎൻഎ
മഞ്ഞിലെ കാൽപാടുകളിൽ നിന്നു ശേഖരിച്ച ഇ-ഡിഎൻഎ പരിശോധിച്ച് ധ്രുവക്കരടിയുടെ ഏകദേശ എണ്ണവും ഇരകളുടെ ലഭ്യതയുമുൾപ്പെടെ നിർണയിക്കാൻ WWF ഗവേഷകർക്ക് സാധിച്ചു. ഫ്ലോറിഡയിലെ ഗവേഷകരാകട്ടെ തീരത്തെ മണലും കടൽവെള്ളവും ശേഖരിക്കുകയും ഇ-ഡിഎൻഎ നിരീക്ഷിച്ച് കടലാമകളുടെ തൽസ്ഥിതി കണ്ടെത്തുകയും ചെയ്തു.  ആമസോൺ നദിയിലെയും, ഒഡിഷയിലെ ചിൽക്ക തടാകത്തിലെയും ജൈവവൈവിധ്യം നിർണയിക്കാനും അധിനിവേശ മത്സ്യങ്ങളുടെ സാന്നിധ്യം കണ്ടെത്താനും ഇ- ഡിഎൻഎ പരിശോധന 
ഉപയോഗപ്പെടുന്നുണ്ട്. 

∙വീണ്ടും വിൻസ്റ്റൻസ് ഗോൾഡൻ മോൾ
തെക്കേ അമേരിക്കയിൽ കാണപ്പെട്ടിരുന്ന എലിവർഗത്തിൽപ്പെട്ട 'വിൻസ്റ്റൻസ് ഗോൾഡൻ മോൾ ' 1943ൽ വംശമറ്റതായി പ്രഖ്യാപിക്കപ്പെട്ടു. ജീവിതം ഏറക്കുറെ മണ്ണിനടിയിൽ കഴിച്ചുകൂട്ടുന്ന ജീവിയാണിത്. ഇ-ഡിഎൻഎ സാങ്കേതികവിദ്യ വികസിച്ച ശേഷം ഒരു സംഘം ഗവേഷകർ ഈ ജീവി ഉണ്ടായിരുന്ന പ്രദേശങ്ങളിൽ കുഴികളുണ്ടാക്കി മണ്ണുസാമ്പിളുകൾ ശേഖരിച്ചു. ഗവേഷകരെ വിസ്മയിപ്പിച്ചുകൊണ്ട് 'വിൻസ്റ്റൻസ് ഗോൾഡൻ മോളിന്റെ' ഇ-ഡിഎൻഎ അതിൽ കണ്ടെത്തി. തുടർന്ന് നടത്തിയ തിരച്ചിലിൽ വംശമറ്റതായി കരുതിയിരുന്ന ഗോൾഡൻ മോളിനെ 80 വർഷത്തിനുശേഷം ഗവേഷകർ നേരിട്ട് കണ്ടു. മനുഷ്യരും നിരന്തരമായി ഇ-ഡിഎൻഎ 
നിക്ഷേപിക്കുന്നുണ്ട് കേട്ടോ. പരിശോധിക്കാൻ പര്യാപ്തമല്ലാത്ത വിധം ശിഥിലമായതാണ് ഇ–ഡിഎൻഎ എന്ന ധാരണ ഇപ്പോൾ ഇല്ല. 
കുറ്റാന്വേഷണത്തിലുൾപ്പെടെ വലിയ മാറ്റങ്ങളാണ് ഇ– ഡിഎൻഎ കൊണ്ടുവരാൻ പോകുന്നത്.