അന്യഗ്രഹജീവികളോട് എങ്ങനെ സംസാരിക്കും; ഉത്തരം തരാൻ കൂനൻ തിമിംഗലങ്ങളുമായി ആശയവിനിമയം

ഭാവിയിൽ നമ്മളൊരു അന്യഗ്രഹജീവിയെ കണ്ടെത്തിയാൽ എന്താകും സ്ഥിതി?

എന്തു ഭാഷയിൽ നാം അവരോട് സംസാരിക്കും. ഏതായാലും ഇംഗ്ലിഷും മലയാളവും അങ്ങനെ ലോകത്തുള്ള ഭാഷകളൊന്നും മനസ്സിലാകില്ലെന്ന് ഏകദേശം ഉറപ്പാണ്.

അന്യഗ്രഹജീവികളെ കണ്ടെത്താനും അവരോട് ആശയവിനിമയം സ്ഥാപിക്കാനും ഉദ്ദേശിച്ചുള്ള ഗവേഷണ സംഘടനയാണ് സെർച് ഫോർ എക്‌സ്ട്ര ടെറസ്ട്രിയൽ ഇന്‌റലിജൻസ് അഥവാ സേറ്റി. ഇപ്പോഴിതാ പുതിയൊരു പദ്ധതിയുമായി വന്നിരിക്കുകയാണ് സേറ്റി. ഭാവിയിൽ ഏലിയൻസുമായി ആശയവിനിമയം നടത്തേണ്ടി വന്നാൽ അതിന്റെ രീതി പഠിക്കാനായി ഭൂമിയിൽ തന്നെയുള്ള ബുദ്ധികൂർമതയുള്ള മൃഗങ്ങളുമായി സംവദിക്കാനാണ് ഈ പദ്ധതി ലക്ഷ്യമിടുന്നത്.

ഇതിനായി വിദഗ്ധർ തിരഞ്ഞെടുത്തത് കൂനൻ തിമിംഗലം അഥവാ ഹംപ്ബാക്ക് വേൽസിനെയാണ്, വളരെ ബുദ്ധിശക്തി പ്രകടിപ്പിക്കുന്നതും സങ്കീർണമായ സാമൂഹിക വ്യവസ്ഥകളുണ്ടാക്കുന്നതുമായ ഹംപ്ബാക്ക് തിമിംഗലങ്ങളിലൊന്നായ ട്വെയിൻ എന്ന പെൺതിമിംഗലവുമായി ശാസ്ത്രജ്ഞർ ഇപ്പോൾ 20 മിനിറ്റോളം സംവദിച്ചതാണ് പദ്ധതിയിലെ നിർണായകമായ പുതിയ നാഴികക്കല്ല്.

വെള്ളത്തിൽ സ്ഥാപിച്ച ഒരു സ്പീക്കറിൽ നിന്നു ശബ്ദം പുറപ്പെടുവിച്ചാണ് ഈ ആശയവിനിമയം ശാസ്ത്രജ്ഞർ സാധ്യമാക്കിയത്. ഏറ്റവും കുറ്റമറ്റ രീതിയിലല്ല തങ്ങളുടെ പരീക്ഷണം പോയതെന്ന് ശാസ്ത്രജ്ഞർ പറയുന്നു.

മെഗാപ്‌റ്റെറ നോവെംഗ്ലെിയെ എന്നറിയപ്പെടുന്ന കൂനൻ തിമിംഗലം, ലോകമെമ്പാടുമുള്ള സമുദ്രങ്ങളിൽ വസിക്കുന്ന ഏറ്റവും പ്രശസ്തവും ഗംഭീരവുമായ സസ്തനികളിൽ ഒന്നാണ്. ഡോർസൽ ഫിൻ ഭാഗത്തെ വ്യത്യസ്തമായ കൊമ്പും നീളമുള്ള പെക്‌റ്റൊറൽ ഫിനുകളും കൊണ്ട് തിരിച്ചറിയാവുന്ന കൂനൻ തിമിംഗലങ്ങൾ ജലോപരിതലത്തിൽ വാലുകൾ അടിച്ചു മുന്നേറുന്നതുൾപ്പെടെയുള്ള അക്രോബാറ്റിക് ഡിസ്‌പ്ലേകൾക്ക് പേരുകേട്ടതാണ്.

ആശയവിനിമയം, ഇണയെ ആകർഷിക്കൽ, അല്ലെങ്കിൽ പരാന്നഭോജികളെ പുറത്താക്കൽ എന്നിങ്ങനെയുള്ള പല ഉദ്ദേശ്യങ്ങൾക്കായാണ് ഇവയുടെ ഇത്തരം പെരുമാറ്റങ്ങൾ.

കൂനൻ തിമിംഗലങ്ങൾ തണുത്തതും ചൂടുള്ളതുമായ വെള്ളത്തിൽ കാണപ്പെടുന്നു, ഇവ് ഭക്ഷണത്തിനും പ്രജനനത്തിനുമായി കാലാനുസൃതമായ കുടിയേറ്റം നടത്തുന്ന  ജീവികളാണ്. ഹംപ്ബാക്ക് തിമിംഗലങ്ങൾ അവയുടെ ശ്രദ്ധേയമായ ശബ്ദങ്ങൾക്ക് പേരുകേട്ടതാണ്. വ്യക്തികൾ തമ്മിലുള്ള ആശയവിനിമയം മുതൽ ഇണചേരൽ ചടങ്ങുകളിൽ ആധിപത്യം സ്ഥാപിക്കുന്നത് വരെ ഈ ശബ്ദങ്ങളുടെ ലക്ഷ്യമാണെന്ന് ശാസ്ത്രജ്ഞർ പറയുന്നു.

ഈ ഗാനങ്ങളുടെ ഉദ്ദേശ്യം ശാസ്ത്രീയ അന്വേഷണത്തിന്റെ വിഷയമായി തുടരുന്നു. മുതിർന്ന കൂനൻ തിമിംഗലങ്ങൾക്ക് 50 അടി വരെ നീളവും 40 ടൺ വരെ ഭാരവും ഉണ്ടാകും. പ്രാഥമികമായി ഇവ ചെറിയ മത്സ്യങ്ങളും ക്രില്ലുമാണ് കഴിക്കുന്നത്. മത്സ്യബന്ധന ഉപകരണങ്ങളിൽ കുടുങ്ങിപ്പോകൽ, യാനങ്ങളുമായി കൂട്ടിയിടിക്കൽ, പാരിസ്ഥിതിക മാറ്റങ്ങൾ തുടങ്ങിയ ഭീഷണികൾ ഇവ നേരിടുന്നുണ്ട്. ഈ സൗമ്യരായ ഭീമൻമാരെ സംരക്ഷിക്കുന്നതിനുള്ള സംരക്ഷണ ശ്രമങ്ങൾ നടന്നുകൊണ്ടിരിക്കുകയാണ്. കൂനൻ തിമിംഗലങ്ങളുടെ ക്ഷേമം സമുദ്രങ്ങളുടെ മൊത്തത്തിലുള്ള ആരോഗ്യത്തെ സൂചിപ്പിക്കുന്നു.