ചുള്ളിക്കമ്പുകൊണ്ട് തല്ലി യുവാവ്, പ്രകോപിതനായ ആന പിന്നാലെ പാഞ്ഞെത്തി
![viralvideo-elephant ആനയെ ചുള്ളക്കമ്പുകൊണ്ട് തല്ലുന്ന യുവാവ് (Photo: X/@surenmehra)](https://img-mm.manoramaonline.com/content/dam/mm/mo/environment/environment-news/images/2024/2/27/viralvideo-elephant.jpg?w=1120&h=583)
Mail This Article
മനുഷ്യനും വന്യജീവികളും തമ്മിലുള്ള സംഘർഷം പലയിടത്തും തുടരുകയാണ്. നാട്ടിലെത്തുന്ന ആനകളെ പടക്കവും തീയും ഉപയോഗിച്ചാണ് ആളുകൾ നേരിടുന്നത്. കാടിറങ്ങുന്ന വന്യജീവികളെ പ്രകോപിപ്പിക്കരുതെന്ന് വനംവകുപ്പ് നിർദേശം നൽകാറുണ്ടെങ്കിലും കൃഷിയും വീടും തകർക്കുമോയെന്ന ഭയത്തിൽ ആളുകൾ തുരത്തിയോടിക്കുന്നു. കഴിഞ്ഞ ദിവസം എക്സ് പ്ലാറ്റ്ഫോമിൽ എത്തിയ വിഡിയോ തികച്ചും വ്യത്യസ്തമായിരുന്നു. ആനക്കൂട്ടത്തിനിടയിലേക്ക് പോയി ഒരാനയെ യുവാവ് ചുള്ളിക്കമ്പുകൊണ്ട് അടിക്കുകയാണ്. പഴയ വിഡിയോ ആണെങ്കിലും ഇപ്പോഴത്തെ സാഹചര്യത്തിൽ വീണ്ടും സമൂഹമാധ്യമങ്ങളിൽ വൈറലാവുകയാണ്.
ഒരു കൂട്ടം ആനകൾ നിൽക്കുമ്പോഴാണ് രണ്ട് യുവാക്കൾ അതിനനടുത്തേക്ക് പോകുന്നത്. അതിലൊരാൾ ചുള്ളിക്കമ്പുമായി ആനയുടെ അടുത്തെത്തുകയും തുമ്പിക്കൈയിൽ തലങ്ങും വിലങ്ങും അടിക്കുകയും ചെയ്തു. പ്രകോപിതനായ ആന യുവാക്കളെ ഓടിക്കുന്നത് വിഡിയോയിൽ കാണാം. ആന യുവാവിന്റെ അടുത്തെത്തുന്നതോടെ വിഡിയോ അവസാനിക്കുകയാണ്.
നാല് സെക്കന്റ് ദൈർഘ്യമുള്ള വിഡിയോ ലക്ഷങ്ങളാണ് കണ്ടത്. യുവാവിന് പിന്നീട് എന്തുസംഭവിച്ചു എന്ന് വിഡിയോയ്ക്ക് താഴെ നിരവധിപ്പേർ ചോദിച്ചിട്ടുണ്ട്. ബന്ധപ്പെട്ടവർ ആരും മറുപടി നൽകിയിട്ടില്ല. കാട്ടിൽക്കയറി അവരെ ആക്രമിക്കുന്നത് കുറ്റകരമാണെന്നും അവർക്കെതിരെ നടപടിയെടുക്കണമെന്നും ചിലർ പറഞ്ഞു. എന്നാൽ ആനകൾ തേയിലത്തോട്ടത്തിലാണെന്നും ചിലർ വ്യക്തമാക്കി.