മുസന്ന സൂപ്പർ കപ്പ് ഗാലന്‍റസ് എഫ്‌സി ജേതാക്കൾ

മുസന്ന ∙ പ്രവാസി വെൽഫെയർ മുസന്ന സംഘടിപ്പിച്ച മുസന്ന സൂപ്പർ കപ്പിൽ ഗാലന്‍റസ് എഫ്‌സി ഒമാൻ ജേതാക്കളായി. ഇന്ത്യൻ ഫുട്‌ബോൾ ടീം അംഗവും ഇന്ത്യൻ സൂപ്പർ ലീഗിൽ ഹൈദരാബാദ് എഫ് സി താരവുമായ റബീഹ് ടൂർണമെന്‍റ് ഉദ്ഘാടനം നിർവഹിച്ചു.

ഫൈനലിൽ മസ്‌കത്ത് ഹാമേഴ്‌സുമായുള്ള മത്സരം ഗോൾ രഹിത സമനിലയിൽ പിരിഞ്ഞതോടെ ഷൂട്ടൗട്ടിലേക്ക് നീങ്ങുകയായിരുന്നു. ഷൂട്ടൗട്ടിൽ മൂന്നിൽ രണ്ട് കിക്കും സേവ് ചെയ്ത ഗാലന്‍റസ് എഫ്‌സി കീപ്പർ വിമൽ തന്നെയാണ് ടൂർണമെന്‍റിലെ മികച്ച കീപ്പർ. ടോപ്പ് ടെൻ ബർക മൂന്നാം സ്ഥാനവും ബ്രദേഴ്‌സ് ബർക നാലാം സ്ഥാനവും സ്വന്തമാക്കി.

ടൂർണമെന്‍റിലെ മികച്ച കളിക്കാരൻ ആയി നദീർ (മസ്‌കത്ത് ഹാമേഴ്‌സ്), ടോപ്പ് സ്‌കോറർ ആയി സഹദ് (ബ്രദേഴ്‌സ് ബർക), പ്രതിരോധ താരം ആയി നസീഫ് ഇരിക്കൂർ, കീപ്പറായി വിമൽ (ഗാലന്‍റസ് എഫ് സി) എന്നിവരെയും തിരഞ്ഞെടുത്തു. നിരവധി പേർ കളി കാണാൻ എത്തിയിരുന്നു. വിജയികൾക്ക് ട്രോഫിയും ക്യാഷ് പ്രൈസും മുസന്ന പ്രവാസി വെൽഫെയർ ഭാരവാഹികൾ സമ്മാനിച്ചു.