വായനക്കാരനെ / വായനക്കാരിയെ കാണാനും സംസാരിക്കാനുമായി ഒരു എഴുത്തുകാരൻ എത്രദൂരം വരെ പോകും? എത്രദൂരവും എന്നാണു യുവ എഴുത്തുകാരൻ അഖിൽ പി. ധർമജന്റെ ഉത്തരം. വായനക്കാരോടു സംവദിക്കാനും സ്നേഹം പങ്കിടാനുമായി ദിവസവും ഒട്ടേറെ മണിക്കൂറുകൾ ചെലവഴിക്കാറുള്ള അഖിൽ സ്വദേശമായ ആലപ്പുഴയിൽനിന്ന് വയനാടു വരെ പോയത് അപൂർവതയേറെയുള്ളൊരു കൂടിക്കാഴ്ചയ്ക്ക് വേണ്ടിയായിരുന്നു. 28 വയസ്സുള്ള അഖിലിന്റെ 71 വയസ്സുള്ള വായനക്കാരി രാധമ്മയെ കാണാനും ‘റാം കെയർ ഓഫ് ആനന്ദി’ എന്ന പുതിയ നോവൽ സമ്മാനിക്കാനും.
