ടെക്‌നോ ത്രില്ലർ ഹ്രസ്വചിത്രം; വോയിസി

ഒരു ഫോണിൽ നിന്നുള്ള വോയ്‌സ് കമാൻഡിങ് ഓപ്പറേഷൻ സിസ്റ്റം മൂലം സംഭവിക്കുന്ന കാര്യങ്ങൾ വിവരിക്കുന്ന ടെക്‌നോ ത്രില്ലർ ഹ്രസ്വചിത്രമാണ് VOICEE. വോയ്‌സ് കമാൻഡിങ് ഓപ്പറേഷൻ സിസ്റ്റമായ VOICEE ന്റെ ഉത്ഭവത്തെക്കുറിച്ച് വിവരിച്ചാണ് കഥ തുടങ്ങുന്നത്. ഐടി സാങ്കേതിക വിദഗ്ദ്ധരുടെ സഹായത്തോടെ ഒരു അജ്ഞാത മിലിട്ടറി ഇന്റലിജൻസ് കണ്ടുപിടിച്ച ആർട്ടിഫിഷ്യൽ ഇന്റലിജൻസാണ് VOICEE. ആപ്ലിക്കേഷൻ വികസിപ്പിച്ചെടുക്കുമ്പോൾ അതിന്റെ അപകടം മനസിലാക്കിയ അധികാരികൾ പദ്ധതി ഉപേക്ഷിക്കുന്നു. എന്നാൽ ഡാർക്ക് വെബിലൂടെ ഇന്ത്യയിൽ ആരോ  VOICEE  ഡൗൺലോഡ് ചെയ്യുന്നു. ഡൗൺ‌ലോഡ് ചെയ്ത മൊബൈൽ ഫോൺ പിടിച്ചെടുക്കാൻ ഇന്ത്യൻ മിലിട്ടറി ഇന്റലിജൻസ് രഹസ്യമായി ഉദ്യോഗസ്ഥരെ നിയോഗിക്കുകയും ഫോൺ കണ്ടെത്തുകയും ചെയ്യുന്നു. 

ജയിലിൽ നിന്നും പുറത്തിറങ്ങുന്ന കള്ളനായ രാജനിലൂടെയാണ് ചിത്രം ആരംഭിക്കുന്നത്. സമീപത്തെ ഹോട്ടലിൽ നിന്നും ഒരു ഉദ്യോഗസ്ഥന്റെ ബാഗ് മോഷ്ടിക്കുന്ന രാജന് ബാഗിൽ നിന്നും VOICEE ഇൻസ്റ്റാൾ ചെയ്ത ഫോൺ ലഭിക്കുന്നു.  വിളക്കിൽ നിന്നും വന്ന ഒരു ജീനിയെപ്പോലെ VOICEE രാജനെ സമ്പത്തിന്റെയും സന്തോഷത്തിന്റെയും കൊലപാതകത്തിന്റയും ലൈംഗികതയുടെയും ട്രാൻസിന്റെയും വഞ്ചനയുടെയും ലോകത്തേക്ക് കൂട്ടിക്കൊണ്ടുപോകുന്നു.

ഹ്രസ്വചിത്ര വിഭാഗത്തിൽ ജയ്പൂർ ഇന്റർനാഷണൽ ഫിലിം ഫെസ്റ്റിവലിൽ മികച്ച സൗണ്ട് എഡിറ്ററിനുള്ള അവാർഡും മലബാർ സൗഹൃദവേദി ചലച്ചിത്രമേളയിലെ മികച്ച രണ്ടാമത്തെ ഹ്രസ്വചിത്രത്തിനുള്ള പുരസ്കാരവും VOICEE നേടി. ടാഗോർ ഇന്റർനാഷണൽ ഫിലിം ഫെസ്റ്റിവൽ, നെക്‌സ്‌ജിൻ ഇന്റർനാഷണൽ ഷോർട്ട് ഫിലിം ഫെസ്റ്റിവൽ, ദി ലിഫ്റ്റ്-ഓഫ് സെഷനുകൾ, Filmy Monk ഫിലിം ഫെസ്റ്റിവൽ, പതിനൊന്നാമത് അണ്ടർഗ്രൗണ്ട് സിനിമാ ഷോർട്ട് ഫിലിം അവാർഡുകൾ, എംപി ഫിലിം അവാർഡ്, മുംബൈ ഇന്റർനാഷണൽ കൾട്ട് ഫിലിം ഫെസ്റ്റിവൽ , തമിഴ്‌നാട് ഇൻഡിപ്പെൻഡന്റ് ഫിലിം ഫെസ്റ്റിവൽ, ഐസി‌എ - ഇന്റർനാഷണൽ കൾച്ചറൽ ആർട്ടിഫാക്റ്റ് ഫിലിം ഫെസ്റ്റിവൽ, ലോംഗ് സ്റ്റോറി ഷോർട്ട്സ് എന്നിവയിൽ VOICEE തിരഞ്ഞെടുക്കപ്പെട്ടു.

യൂണികോൺ ഡ്രീം റൈഡേഴ്സ് മോഷൻ പിക്ചേഴ്സിന്റെ ബാനറിൽ ആണ് നിർമാണം. ഈ കഥ ആവിഷ്കരിച്ച് സംവിധാനം ചെയ്തത് സനിൽ തോമസാണ് . ഡിസ്നി ജെയിംസാണ് ക്രിയേറ്റീവ് ഡയറക്ടർ. തിരക്കഥ ജോൺ എം. പ്രസാദും എഡിറ്റിങ് അരവിന്ദ് മൻ‌മഥനും ഡി‌ഒ‌പി ശ്രീകാന്ത് ഇലയും ബി‌ജി‌എം റോണി റാഫേലോം സൗണ്ട് മിക്സിങ് എം.ആർ. രാജകൃഷ്ണനും നിർവഹിക്കുന്നു.