ചെമ്മീന്‍ അഥവാ കൊഞ്ച് ഇഷ്ടമല്ലാത്ത മീന്‍ പ്രേമികള്‍ ഉണ്ടാവില്ല. മാങ്ങയും ചക്കക്കുരുവും മുരിങ്ങാക്കോലുമെല്ലാമിട്ട നാടന്‍ ചെമ്മീന്‍ കറി മാറ്റിപ്പിടിച്ച് ഒരു കിടിലന്‍ സ്പൈസി ബട്ടര്‍ ഗാര്‍ലിക് ചെമ്മീന്‍ വിഭവം ഉണ്ടാക്കിയാലോ? 

ഷെഫും ന്യൂട്രീഷനിസ്റ്റുമായ ആതിര സേതുമാധവന്‍ ഇന്‍സ്റ്റഗ്രാമില്‍ പങ്കുവച്ചതാണ് ഈ വിഭവം.  വെറും 277 കാലറി മാത്രമുള്ള ബട്ടര്‍ ഗാര്‍ലിക് ചെമ്മീനില്‍ 32 ഗ്രാം പ്രോട്ടീനുമുണ്ട്‌. അതുകൊണ്ട്, ഭാരം കുറയ്ക്കാന്‍ ആഗ്രഹിക്കുന്നവര്‍ക്കും കഴിക്കാവുന്ന രുചിയേറിയതും ഹെല്‍ത്തിയുമായ ഒരു വിഭവമാണിത്. 

സ്പൈസി ബട്ടര്‍ ഗാര്‍ലിക് ചെമ്മീന്‍

ചേരുവകൾ

2 ടീസ്പൂൺ ലൈറ്റ് ബട്ടർ

1.5 ടീസ്പൂൺ വെളുത്തുള്ളി അരിഞ്ഞത് 

1.5 ടീസ്പൂൺ മുളക് അരിഞ്ഞത്

വൃത്തിയാക്കിയ ചെമ്മീന്‍ - 150 ഗ്രാം 

1 ടേബിൾസ്പൂൺ തേങ്ങാപ്പാല്‍

1/ 3 നാരങ്ങ

1 ടീസ്പൂൺ സോയ സോസ്

ഉപ്പ്

1 ടീസ്പൂൺ വെളുത്ത എള്ള് 

തയാറാക്കുന്ന വിധം

1. പാനില്‍ ബട്ടര്‍ ഉരുക്കി, വെളുത്തുള്ളിയും മുളകുമിട്ട് സ്വർണ്ണനിറമാകുന്നതുവരെ വഴറ്റുക.

2. ചെമ്മീന്‍, സോയ സോസ്, ഉപ്പ് എന്നിവ ചേർത്ത് 2-3 മിനിറ്റ് വേവിക്കുക.

3. തേങ്ങാപ്പാൽ, നാരങ്ങ എന്നിവ ചേർത്ത് സോസ് കട്ടിയാകുന്നതുവരെ വേവിക്കുക.

4. എള്ള് മുകളില്‍ വിതറി അലങ്കരിക്കുക