പ്രോട്ടീന്‍ കിട്ടാന്‍ സോയാചങ്ക്സ് എന്നും കഴിക്കുന്നത് നല്ലതാണോ?

പ്രോട്ടീന്‍റെ കലവറയാണ് സോയാചങ്ക്സ്. മാത്രമല്ല, ഫ്രൈ ചെയ്തും കറിവച്ചുമൊക്കെ കഴിക്കാന്‍ വളരെ രുചികരവുമാണ് ഇത്. എത്ര തിരക്കിനിടയിലായാലും പെട്ടെന്ന് ഉണ്ടാക്കാം. മുട്ട, മാംസം, പാലുൽപ്പന്നങ്ങൾ തുടങ്ങിയവയൊന്നും കഴിക്കാത്ത വീഗന്‍മാര്‍ക്ക് പലപ്പോഴും ഇതൊരു രക്ഷകനാണ്‌ എന്ന് പറയാം. സോയാബീൻ എണ്ണ വേർതിരിച്ചെടുക്കുന്ന പ്രക്രിയയുടെ ഉപോൽപ്പന്നമായ ഡീഫാറ്റഡ് സോയ ഫ്ലോറിൽ നിന്നാണ് സോയാചങ്ക്സ്  (Soya Chunks) നിർമ്മിക്കുന്നത്. മാംസത്തോട് സാമ്യമുള്ള ചെറിയ, കട്ടിയുള്ള കഷണങ്ങളായി മാവ് പ്രോസസ്സ് ചെയ്യുന്നു. ദിവസേനയുള്ള പ്രോട്ടീന്‍ ആവശ്യകത നിറവേറ്റാന്‍ സോയാ ചങ്ക്സിന് കഴിയും. ഇരുമ്പ്, കാൽസ്യം, ബി വിറ്റാമിനുകൾ തുടങ്ങിയ അവശ്യ പോഷകങ്ങളും അവശ്യ അമിനോ ആസിഡുകളും ഇതില്‍ അടങ്ങിയിട്ടുണ്ട്. പൂരിത കൊഴുപ്പ് കുറവായതിനാല്‍ ഇത് ഹൃദയത്തിന്‌ ആരോഗ്യകരമാണ്. ശരീരഭാരം നിയന്ത്രിക്കാൻ സഹായിക്കുകയും ചെയ്യുന്നു. ഇതില്‍ അടങ്ങിയിട്ടുള്ള ഫൈറ്റോസ്റ്റെറോളുകളുടെ സാന്നിധ്യം ചീത്ത കൊളസ്ട്രോളിന്‍റെ അളവ് കുറയ്ക്കാനും ഹൃദ്രോഗ സാധ്യത കുറയ്ക്കാനും സഹായിക്കും. കൂടാതെ, നാരുകള്‍ അടങ്ങിയിട്ടുള്ളതിനാല്‍ ദഹനം സുഗമമാക്കാനും ഇത് സഹായിക്കും. സോയ ചങ്ക്സില്‍ ഫൈറ്റോ ഈസ്ട്രജൻ അടങ്ങിയിട്ടുണ്ട്, ഇത് സ്തനാർബുദം, പ്രോസ്റ്റേറ്റ് കാൻസർ ഉൾപ്പെടെയുള്ള ചില ക്യാൻസറുകളുടെ സാധ്യത കുറയ്ക്കുമെന്ന് തെളിയിക്കപ്പെട്ടിട്ടുണ്ട്. ഇത്രയേറെ ഗുണങ്ങള്‍ ഉണ്ടെങ്കില്‍പ്പോലും സോയ ചങ്ക്സ് ദിവസേന കഴിക്കുന്നത് ആരോഗ്യത്തിന് നല്ലതല്ല. ഇവയില്‍ അടങ്ങിയ ചില വസ്തുക്കള്‍ ഗുണത്തെക്കാളേറെ ശരീരത്തിന് ദോഷംചെയ്യും. 

ഫൈറ്റോ ഈസ്ട്രജൻ
സോയ ചങ്ക്സില്‍, ശരീരത്തിലെ ഈസ്ട്രജൻ ഹോർമോണിനെ അനുകരിക്കാൻ കഴിയുന്ന ഫൈറ്റോ ഈസ്ട്രജനായ ഐസോഫ്ലേവോൺ സംയുക്തങ്ങൾ അടങ്ങിയിട്ടുണ്ട്. ഫൈറ്റോ ഈസ്ട്രജന്‍റെ അമിതമായ ഉപഭോഗം ഹോർമോൺ ബാലൻസ് തെറ്റിക്കും, പ്രത്യേകിച്ച് സ്ത്രീകളിൽ, ആർത്തവ ക്രമക്കേടുകൾ പോലുള്ള പ്രശ്‌നങ്ങളിലേക്ക് നയിക്കുന്നു. ആഴ്ചയിൽ 4 തവണയിൽ കൂടുതൽ സോയ കഴിക്കുന്നത് തൈറോയ്ഡ് തകരാറുണ്ടാക്കാന്‍ കാരണമാകും.  

ആന്‍റിന്യൂട്രിയന്റുകൾ
സോയ ചങ്കുകളിൽ ട്രിപ്സിൻ ഇൻഹിബിറ്ററുകൾ പോലെയുള്ള ആന്റിന്യൂട്രിയന്റുകൾ അടങ്ങിയിട്ടുണ്ട്, ഇത് വലിയ അളവിൽ കഴിച്ചാൽ പ്രോട്ടീൻ ദഹനത്തെയും പോഷകങ്ങളുടെ ആഗിരണത്തെയും തടസ്സപ്പെടുത്തും.

അലർജികളും സെൻസിറ്റിവിറ്റികളും
ചില വ്യക്തികൾക്ക് സോയ അലർജിയോ സെൻസിറ്റിവിറ്റിയോ ഉണ്ടാകാം, ദിവസേനയുള്ള ഉപഭോഗം മൂലം വയറിന് അസ്വസ്ഥത പോലുള്ള ലക്ഷണങ്ങള്‍ ഉണ്ടാകാം.

അഡിറ്റീവുകളും പ്രിസർവേറ്റീവുകളും
സോയ ചങ്ക്സ് ഉണ്ടാക്കുമ്പോള്‍ അതില്‍ അഡിറ്റീവുകളും പ്രിസർവേറ്റീവുകളും ചേര്‍ക്കുന്നുണ്ട്. ഇത് ആരോഗ്യത്തിന് നല്ലതല്ല.

സോയ ചങ്ക്സ് എങ്ങനെ കഴിക്കണം?
സോയ ചങ്ക്സ് കഴിക്കുമ്പോള്‍ കൂടെ വൈവിധ്യമാര്‍ന്ന പച്ചക്കറികളും പഴങ്ങളും ഭക്ഷണത്തില്‍ ഉള്‍പ്പെടുത്താന്‍ ശ്രദ്ധിക്കണം. പ്രോട്ടീന്‍ ലഭിക്കാന്‍ സോയ ചങ്ക്സിനെ മാത്രം ആശ്രയിക്കുന്നത് ബുദ്ധിപരമല്ല. കൂടുതല്‍ മാര്‍ഗ്ഗനിര്‍ദ്ദേശങ്ങള്‍ക്കായി ഡോക്ടറെയോ ന്യൂട്രീഷനിസ്റ്റിനെയോ കണ്ടു ആലോചിക്കാവുന്നതാണ്.

സോയ ചങ്ക്സ് മസാല തയാറാക്കാം
 ആവശ്യത്തിനുള്ള സോയ ചങ്ക്സ് വെള്ളത്തിൽ തിളപ്പിച്ച് നല്ലതുപോലെ കഴുകി പിഴിഞ്ഞെടുക്കുക. സവാളയും ഇഞ്ചി വെളുത്തുള്ളി പേസ്റ്റും പച്ചമുളകും ചേർത്ത് ചീനച്ചട്ടിയിൽ വെളിച്ചെണ്ണ ഒഴിച്ച് വഴറ്റിയെടുക്കാം. നന്നായി വഴന്നു വരുമ്പോൾ അതിലേക്ക് കശ്മീരി മുളക് പൊടിയും മഞ്ഞപൊടിയും മല്ലിപൊടിയും കുരുമുളക് ചതച്ചതും ഗരം മസാലയും ഉപ്പും ചേർത്ത് നന്നായി യോജിപ്പിക്കാം. ആവശ്യത്തിനുള്ള വെള്ളവും ചേർത്ത് അടച്ചുവയ്ക്കാം. 5മിനിറ്റിനു ശേഷം തുറന്നുനോക്കാം. നല്ല അടിപൊളി സ്വാദിൽ സോയ ചങ്ക്സ് മസാല റെഡി.

മലയാളികളുടെ പാചകരീതിയിൽ വരുത്തേണ്ട മാറ്റങ്ങൾ - വിഡിയോ