കോംപാക്ട് എസ് യു വിയായ ‘നെക്സ’ന്റെ ഓട്ടമേറ്റഡ് മാനുവൽ ട്രാൻസ്മിഷൻ (എ എം ടി) വകഭേദം ടാറ്റ മോട്ടോഴ്സ് പുറത്തിറക്കി. 9.41 ലക്ഷം രൂപ മുതലാണ് ‘നെക്സൻ എ എം ടി’ക്കു ഡൽഹിയിലെ ഷോറൂം വില.
ഇകോ, സിറ്റി, സ്പോർട് എന്നീ മൾട്ടി ഡ്രൈവ് മോഡോടെ ലഭ്യമാവുന്ന ആദ്യ എ എം ടി മോഡലാണ് ‘നെക്സൻ ഹൈപ്പർ ഡ്രൈവ് എസ് — എസ് ജി’യെന്ന് ടാറ്റ മോട്ടോഴ്സ് അവകാശപ്പെട്ടു. ക്ലച് പെഡൽ ആവശ്യമില്ലാത്ത സാങ്കേതികവിദ്യയെ സ്മാർട് ഷിഫ്റ്റ് ഗീയർ(എസ് എസ് ജി) എന്നാണു ടാറ്റ മോട്ടോഴ്സ് വിളിക്കുന്നത്. പെട്രോൾ, ഡീസൽ എൻജിനുകൾക്കൊപ്പം ടാറ്റ മോട്ടോഴ്സ് എസ് എസ് ജി വാഗ്ദാനം ചെയ്യുന്നുണ്ട്. പെട്രോൾ എ എം ടിയുടെ വില 9.41 ലക്ഷം രൂപയിൽ തുടങ്ങുമ്പോൾ ഡീസൽ പതിപ്പിന്റെ വില 10.30 ലക്ഷം രൂപയിലാണ് ആരംഭിക്കുക.
‘ഹൈപ്പർ ഡ്രൈവ് എസ് — എസ് ജി’യുടെ വരവോടെ കോംപാക്ട് എസ് യു വി വിപണിയിൽ മാത്രമല്ല എ എം ടി വിഭാഗത്തിലും പങ്കാളിത്തം ഉയർത്താൻ ‘നെക്സ’നു സാധിക്കുമെന്നു ടാറ്റ മോട്ടോഴ്സ് പ്രസിഡന്റ് (പാസഞ്ചർ വെഹിക്കിൾ ബിസിനസ് യൂണിറ്റ്) മയങ്ക് പരീക്ക് പ്രതീക്ഷ പ്രകടിപ്പിച്ചു. എ എം ടിക്കു പുറമെ ഉടമസ്ഥന്റെ ഇഷ്ടത്തിനൊത്ത് ‘നെക്സൻ’ അണിയിച്ചൊരുക്കാൻ അവസരം നൽകുന്ന ഓൺലൈൻ കസ്റ്റമൈസേഷൻ പ്ലാറ്റ്ഫോമായ ‘ഇമാജിനേറ്റ’റും ടാറ്റ മോട്ടോഴ്സ് അവതരിപ്പിച്ചിട്ടുണ്ട്. കാഴ്ചപ്പകിട്ട് പകരുന്നതിനൊപ്പം സ്വന്തം ഇഷ്ടപ്രകാരമുള്ള അക്സസറികൾ ഘടിപ്പിക്കാനും ‘ഇമാനിജിനേറ്റർ’ വഴിയൊരുക്കുന്നുണ്ട്.