തിരുവനന്തപുരം∙ സംസ്ഥാന സാക്ഷരതാ മിഷൻ അതോറിറ്റിയുടെ പത്താംതരം തുല്യതാ പരീക്ഷയിൽ 15,653 പേർ വിജയിച്ചു. 90.89 ശതമാനമാണു വിജയം. മലപ്പുറം തിരൂരങ്ങാടി എസ്എൻഎംഎച്ച്എസിൽ പരീക്ഷ എഴുതിയ കെ.കെ. സയ്യിദ് ഹാഷിർ എല്ലാ വിഷയങ്ങളിലും എ പ്ലസ് നേടി.
ആലപ്പുഴ ജില്ലയിലാണ് ഏറ്റവും കൂടുതൽ പേർ വിജയിച്ചത്. 2007ൽ ആരംഭിച്ച പത്താംതരം തുല്യത കോഴ്സിൽ ഏറ്റവും മികച്ച വിജയമാണ് ഇത്തവണത്തേത്. വിജയിച്ചവരിൽ 22 ട്രാൻസ്ജെൻഡറുകളും ഉൾപ്പെടുന്നു. തിരുവനന്തപുരത്തു പരീക്ഷ എഴുതിയ മുഴുവൻ ട്രാൻസ്ജെൻഡറുകളും വിജയിച്ചു. 6 പേരാണ് ഇവിടെ കരമന ഗവ. ബോയ്സ് ഹയർ സെക്കൻഡറി സ്കൂളിൽ പരീക്ഷ എഴുതിയത്.
സംസ്ഥാനത്തു മൊത്തം 25 ട്രാൻസ്ജെൻഡറുകളാണു കഴിഞ്ഞ നവംബർ 9 ന് നടന്ന സാക്ഷരതാ മിഷന്റെ പത്താംതരം തുല്യത പരീക്ഷ എഴുതിയത്. കൊല്ലത്തായിരുന്നു ഏറ്റവും കൂടുതൽ പേർ എഴുതിയത് - 9. കണ്ണൂർ, വയനാട്, മലപ്പുറം ജില്ലകളിലായി രണ്ടു പേർ വീതവും പത്തനംതിട്ട, ഇടുക്കി, കാസർകോട്, തൃശൂർ ജില്ലകളിലായി ഒരാൾ വീതവും പരീക്ഷ എഴുതി. വിജയികൾക്കു സാക്ഷരതാ മിഷന്റെ ഹയർ സെക്കൻഡറി തുല്യത കോഴ്സിൽ ചേരാം. ജനുവരി 27 ന് ഒന്നാംവർഷ റജിസ്ട്രേഷൻ ആരംഭിക്കും